Asturies foi la comunidá autónoma con mayor tasa de mortalidá nel 2006

"Asturies foi la comunidá autónoma con mayor tasa de mortalidá nel 2006, que s'asitió en 1.166,7 muertos por cada 100.000 habitantes, según datos del Institutu Nacional d'Estadística (INE). Per detrás d'Asturies ta Galicia con una tasa de 1.080 muertes por cada 100.000 habitantes, Castiella y Lleón, Aragón y Cantabria. Toes estes comunidaes tán penriba de la media nacional (843 casos).

A nivel xeneral, les enfermedaes cardiovasculares foron la primera causa de muertes nel 2006, siendo responsables del 32,5%, de los muertos n'España. En segundu llugar, tuvieron un añu más los tumores, causantes de 101.669 defunciones, un 1,2 por cientu más que nel 2005. Nun tercer puestu, los males del sistema repiratoriu, que mataron a 39.486 persones l'añu pasáu, según informó güei l'Institutu Nacional d'Estadística. En total, l'añu pasáu morrieron n'España 371.478 persones, 15.877 menos que les rexistraes nel 2005. La tasa bruta de mortalidá s'asitió en 843 muertos por cada 100.000 habitantes, lo que supón una disminución del 4,1% respecto al 2005, añu nel que s'incrementaron les muertes por enfermedaes agravaes pol efectu de la gripe. ""Anque añu tres añu les enfermedaes cardiovasculares se caltienen nel primer puestu, el so pesu relativu nel total de defunciones sigue baxando"", esplica l'informe del INE. Estos males, qu'en 1980 fueron la causa principal de casi la mitá de les muertes, fueron baxando mientres cobraben importancia causes como los tumores, qu'en 1980 representaben el 20,2% de los muertos y güei suponen un 27,37%. Per detrás de los tumores, les causes que más vides se cobraron nel 2006 fueron enfermedaes del aparatu dixestivu nel 5,21% de los casos, y muertes por causes ""esternes"" como suicidios y accidentes de tráficu. Un total de 16.152 persones morrieron nestes circunstancies, espón l'INE. Atendiendo al sexu, les enfermedaes cardiovasculares siguen siendo la primer causa de muerte nes muyeres, en concretu, los males cerebru vasculares fueron la principal causa de muerte nel colectivu con un total de 19.038 muertes. En cuantes a la mortalidá por cáncer, el de mama siguió siendo'l más significativu y mató a 5.956 muyeres (un 3,4% más que l'añu anterior). El cáncer de colon caltúvose en niveles asemeyaos a los del 2005, con 4.284 muertes. El cáncer de bronquios y pulmón, primeru n'importancia ente los homes, provocó 16.879 muertos por esta causa, y 2.634 muertes. Sicasí, l'incrementu respecto al 2005 de la mortalidá por esti tipu de cáncer foi superior nes muyeres (6,7%) que nos homes, según l'INE. Nos homes, la mayor causa de mortalidá son los tumores y, dientro de les enfermedaes cardiovasculares, les isquémiques del corazón, que produxeron l'añu pasáu 21.194 muertes. En cuantes al cáncer, el segundu tipu más significativu nos homes (dempués del pulmonar) foi'l de colon, con 5.642, que suponen un incrementu de la tasa nun 1,4%, respecto al 2005. El cáncer de próstata foi responsable de 5.431 muertes, un 1,8% menos que'l periodu anteiror.

Según conclúi l'INE, los muertos por causes esternes (principalmente accidentes de tráficu y suicidios) son más frecuentes nos varones. Pel contrario, les muertes orixinaes pol sistema nerviosu (como la enfermedá d'Alzheimer o la enfermedá de Parkinson), los trastornos mentales (demencia) y les enfermedaes endocrines, nutricionales y etabóliques (diabetes mellitus) son más elevaes en muyeres. Ente les causes de muertes que más descendieron nel 2006 tán el SIDA, con 1.320 muertos, un 9% menos que nel 2006, y los accidentes de tráficu, qu'ocasionaron 4.129 muertos, un 7,7% menos que l'añu anterior. El númberu de persones muertes por suicidiu disminuyó un 4,9% y supunxo la muerte de 3.234 persones, 2.504 homes y 430 muyeres, lo que ""supón una sobremortalidá masculina de más de 3 a 1"", esplica l'INE.

Nel añu 2006, la edá media de muerte asitióse en 76,37 años. Les principales causes de muerte, los trestornos mentales y del comportamientu, y les enfermedaes de la piel del texíu subcutáneu presentaron les edaes medies más elevaes (85 y 84 años, respectivamente). Les más baxes correspondieron a les causes esternes (56,98 años). Pela so parte, la edá media de muerte por enfermedaes cardiovasculares y tumores, principales causes de muertes nel añu 2006 foi de 80,45 y 71,78 años, respectivamente. Asturies presentó la tasa de mortalidá más elevada y Canaries la más baxa. La mortalidá ta directamente relacionada col avieyamientu de la población, y asina lo espeyen los datos por comunidaes autónomes. Asina, les tases más altes de muertos por cada 100.000 habitantes correspondieron a Asturies (1.166,7), Galicia (1.080,3) y Castiella y Lleón (1.054,4). Pel contrario, les tases más baxes de muertos por cada 100.000 habitantes presentáronse en Canaries (645,4), Madrid (666,1) y Ceuta (669,6)."