El Principáu anuncia novedaes

Los conseyeros de Ciencia y Tecnoloxía y Alministraciones Públiques de la Xunta de Castiella-La Mancha, Isidro Hernández y María del Carmen Valmorisco, anduvieron ayeri de visita per Asturies. Na xornada qu'echaron ente nos, conocieron el proyectu d'aldees dixitales Carreño Dixital y punxeronlos al tantu de lo que va ser el proyectu del Serviciu d'atención al Ciudadanu (SAC) que tien encargáu'l Gobiernu asturianu.Los responsables manchegos nun escatimaron n'eloxos pa les polítiques d'alministración electrónica del Principáu, y dixeron qu'hai coses que-yos prestaría imitar. La Conseyera asturiana Angelina álvarez aprovechó pa esplicar qu'el portal del Principáu va remocicase enteru d'equi al veranu con secciones y servicios nuevos, entamando asina la primer fase del SAC, anque la conseyera nun esplicó coses más concretes de lo nuevo.Habrá que ver si asina va enderechando la deficiente presencia de les instituciones asturianes na rede. Anguaño, el portal oficial del Principáu ofrez en portada conteníos que dempués nun esisten, como la consulta n'asturianu, inglés o francés, o servicios como un buscador internu ensin desarrollar que lleva mangáu na portada dende qu'entamó'l portal. Les carencies de l'alministración asturiana na rede son históriques, y nun hai qu'escaecer qu'Asturies foi la última comunidá del estáu en tener edición electrónica del so boletín oficial. Claro que si l'alministración manchega ta tan interesada n'imitar a l'asturiana no del SAC, meyor entrugaría directamente a la consultora Price Waterhouse, que ye la que ta trabayando nello.