El Principáu afala a regalar n'asturianu

Anque dende'l Principáu se sigue con una política abiertamente contraria al usu de la nuestra llingua, incumpliendo sistemáticamente la "Llei d'Usu y Promoción", l'Alministración tamién sabe guardar les apariencies: Anque nun se faen polítiques normalizadores conscientes, otru añu má, la Conseyería de Cultura vuelve a sacar una campaña cola que supuestamente quier promocionase'l consumu de llibros y música n'asturianu nes navidaes. La campaña va allongase hasta'l día 5 de xineru y vese yá nes televisiones locales y nes sales de cine asturianes, siéntese peles emisores de radio, amás de los clásicos "chirimbolos" de publicidá na cai. Editáronse tamién marcallibros, calendarios y carteles pa repartir peles llibreríes y tiendes de discos.
Esti añu repítese l'"eslógan" del añu pasáu "diz muncho de ti" y amás preténdese dar una imaxe "moderna" y actual, pa romper el tópicu de l'asturianu rellacionáu colo antiguo y tradicional. Pa los "spots" úsase música de "Dixebra".