Xixón Baloncestu 74 - C. San Fernando Málaga 81

El Xixón Baloncestu repitió dellos de los erros a los que tien avezáu al
públicu nun partíu que supunxo la undécima derrota del
añu. Entamó bien el Xixón, ensin Corey Louis na cancha.
Los sevillanos, poco a poco foron recuperando la ventaxa que-yos sacare'l
Xixón nos primeros minutos, pa llegar a la fin del primer cuartu
yá igualaos y siguir asina hasta'l descansu (32-33). Dende entós,
siempre fueron per delantre los sevillanos, xugando'l Xixón por raches,
basaes sobre too en bones aiciones defensives, tan escases esti añu. Nel
últimu cuartu, más de lo mesmo de toa esta temporada.

Con too por decidir, salió de base l'últimu fichaxe,
Thierry Zig, xugador que lleva tres entrenamientos col equipu, una
decisión que nun toos los aficionaos entendieron (de 8 minutos que
xugó, 6 foron nesti cuartu). Con estes traces, a pesar del esfuerzu
final, volviose a perder.

Na rueda de prensa, el tonu de les declaraciones foi el de siempre,
insistiéndose na entrega de los xugadores y na so concentración.
Hai munches coses que nun van nesti equipu, pero nótase más cada
día la falta de direción de xuegu por parte los bases, asina como
capacidá de decisión nos minutos finales, que ye cuando hai
qu'atrevese a tirar.