El Gobiernu propón que la fundación que xestiona l'Hospital d'Oriente pase a ser pública

El Gobiernu del Principáu d'Asturies pidió a los patrones que controlen la representación del Principáu na fundación privada Grande Covián que xestiona l'Hospital d'Oriente que propongan mañana nel conceyu del Patronatu la so tresformación en fundación pública.

Según esplicó güei en rueda prensa tes el Conseyu de Gobiernu'l conseyeru de Salú y Servicios Sanitarios, Ramón Quirós, y el so departamentu tomó la decisión de tresformar en fundación pública la Fundación "Francisco Grande Covián", que xestiona l'Hospital del Oriente d'Asturies del Área Sanitaria IV.

Esti procesu de tresformación, col Sespa como patronu principal pue prollongase unos tres meses.

En tou casu esi carácter públicu de la fundación nun va significar que los trabayadores pasen a integrase nel Serviciu de Salú del Principáu d'Asturies (Sespa) ya que van siguir vinculaos al conveniu qu'establecza'l patronatu. Quirós esplicó que la so situación "nun va cambiar" de manera que los que tengan un contratu indefiníu van siguir rixéndose pol conveniu actual.

"Nun hai una integración directa del personal nel Sespa porque nun ye posible llegalmente", señaló'l conseyeru. Sicasí, matizó qu'anque nun exista esa integración directa, nos últimos años "fízose un esfuerciu tremendu d'homologación de les condiciones llaborales del personal sanitariu".

Recordó, sicasí, que son persones que nun mercaron la condición d'emplegaos públicos. Asina, van respetase los sos contratos, "dando estabilidá" a los trabayadores, que pasen a ser personal al serviciu d'una fundación pública.

"Si tou va bien, dientro de tres meses vamos tener una nueva fundación y va ser el momentu de plantegamos estes cuestiones, pero hasta esi momentu nun hai nengún cambiu", señaló.

Esclarió amás qu'a la hora de contratar nuevu personal va facese al traviés de convocatoria pública. "Nel momentu que seya una Fundación pública les contrataciones han cumplir lo establecío sobre, capacidá, méritu, publicidá, como les demás convocatories públiques", apuntó Quirós.

El conseyeru de Salú y Servicios Sanitarios dixo que la decisión adoptada güei ye frutu del so propiu "compromisu" nuna declaración na Xunta Xeneral del Principáu (XXPA) pa non prollongar la decisión más allá del primer periodu de sesiones.

Recordó que la XXPA alcordó en marzu instar al Conseyu de Gobiernu a poner en marcha'l procesu de tresformación de la Fundación privada que xestiona l'Hospital del Oriente d'Asturies nuna institución pública, a la vez que lo instaba igualmente a constituir una Comisión técnico-política cola participación de les organizaciones sindicales pa ver cómo pue desarrollase esti procesu.

Sin embargu, señaló que nun hubo aproximación ente les distintes postures, polo que tomó la decisión de dar por finalizaos los trabayos remitíos a la XXPA. Asina, cumpliendo'l so compromisu, tomó la decisión güei, de la qu'informó al Conseyu de Gobiernu.

El procesu, de magar agora, pasa por que'l plenu del patronatu apruebe la propuesta. A partir d'ehí, va haber que volver lleer los estatutos de la Fundación y axustalos al so nuevu estatus. Una vez que se faiga esa nueva redacción, los estatutos resultantes van deber se aprobaos pol patronatu actual, que lu va pasar al protectoráu.

Va haber un plazu d'alegaciones, tres el que, si'l protectoráu da'l vistu bonu, la fundación privada va dexar d'existr, constituyéndose una fundación pública na que'l Sespa va tener la mayoría del Principáu.

Al so xuiciu, el Gobiernu socialista cumple asina los sos compromisos y contribúi a la "estabilidá de la plantilla" con un procesu que va dar "muncha más tresparencia" a la fundación.