El PP, dimpuestu a da-y más protección a la llingua nel estatutu

El diputáu del PP na Xunta Xeneral del Principáu, Joaquín Aréstegui, declaróse ayeri favoratible a buscar "el marcu llegal más afayadizu" pa la llingua asturiana, siempre ensin "pasar la llinia encarnada de la obligatoriedá". Dende'l so puntu de vista Asturies sedría asina la primer comunidá autónoma con llingua propia reconocida que nun obligase a deprender o utilizar l'idioma a quien nun quixera.

El parlamentariu retrucaba asina a les declaraciones de la presidenta de l'Academia de la Llingua Asturiana, Ana Cano, que llamaba al PP a xugar un "papel de lideralgu" nel consensu de tolos grupos a favor de la oficialidá.

Aréstegui señaló qu'agradecía l'enfotu nel PP de la presidenta de la Academia "cola que nosotros siempre tuvimos excelentes rellaciones", pero aclarió que "Tenemos una llinia encarnada que nun queremos cruzar que ye la obligatoriedá porque creemos que la utilización de la llingua ye una cuestión de derechos civiles, y naide pue ser discrimináu por ello". Dende esti puntu de partida Aréstegui mostróse a favor de "buscar el marcu llegal más afyadizu pa esa situación". Pal diputáu popular la llingua "pue y debe utilizase en toles instancies sociales y particulares, siempre y cuando nun lleve un mensaxe d'obligatoriedá o de procedimientos d'inmersión llingüística como n'otres comunidaes autónomes".

D'esti mou, según Aréstegui, "Asturies sedría la primer comunidá que nun fadría eso", en comparanza coles comunidaes que tienen llingua oficial reconocida.
"Lo que nun se pue facer ye obligar a naide que nun sepa asturianu a que lu tenga qu'aprender, pero a partir d'ehí basta con buscar cualquier fórmula llegal".

El parlamentariu autonómicu afirmó "ensin dulda nenguna" que'l PP considera que la llingua nun tien protección alministrativa abonda. Por ello, de cara a la ellaboración del próximu Estatutu d'Autonomía, dexó claro que'l PP apoya una fórmula nueva que dependería pa la so aprobación "de la cintura del restu de partíos a la hora de negociar".