L’Academia de la Llingua píde-y al PP que xuegue un papel de lideralgu nel camín a la oficialidá

La presidenta de l'Academia de la Llingua Asturiana, Ana Cano, afirmó esta selmana que'l PP "podría xugar un papel de lideralgu" nel llogru d'un consensu a favor de la oficialidá de tolos grupos políticos representaos na Xunta Xeneral. En declaraciones a l'axencia Europa Press, Ana Cano valoró les últimes manifestaciones de destacaos representantes políticos del Partíu Popular a favor d'una mayor protección de la llingua, como pidió l'alcalde d'Uviéu Gabino de Lorenzo, o d'un marcu llegal nuevu de mayor reconocimientu pal asturianu "ensin obligatoriedá" como pidió'l diputáu autonómicu Joaquín Arístegui.

Ana Cano aseguró que nun-y sorprendía la postura espresada pol PP, en cuantes que "ye normal que los partíos políticos tengan una actitú cada vegada más favorable cola llingua asturiana". "Lo raro" según Ana Cano "ye que los partíos que representen al pueblu asturianu tean en contra de la llingua d'esti pueblu". La presidenta de l'ALLA espresó'l so deséu de que la oficialidá "sía un elementu d'unión y de consensu de toles fuerces polítiques representaes na Xunta Xeneral" y comentó que nesti sentíu, el PP podría xugar un papel de lideralgu fundamental, porque representa a bien de la sociedá asturiana".

P'Ana Cano, en cualquier casu, esi consensu nun pue llegar a otra conclusión que nun sía la oficialidá pal asturianu, qu'ha recoyese nel próximu estatutu d'autonomía d'Asturies" ello asina que n'otres comunidaes con lingua propia féxose esto mesmo.

P'afitar la so postura y demostrar que la sociedá asturiana ta a favor de la oficialidá, Ana Cano acudió a los datos de la última encuesta sociollingüística ellaborada pol equipu del Euskobarómetro, recordando que, acordies con esta encuesta encargada pol mesmu Gobiernu asturianu, "el tantu por cientu d'asturianos que muestren dalgún tipu de discrepancia respective a la oficialidá nun llega al 20% de la población" apuntando que "Los políticos deberíen tener esto en cuenta".

Ana Cano aseguró que l'actual Llei d'Usu y Promoción del asturianu nun da seguridá a los asturianos pa que puean exercer el so derechu a emplear l'asturianu, como vemos tolos díes" y recordó que "la oficialidá nun lleva arreyada obligación nenguna d'emplegar l'asturianu pal ciudadanu que nun quiera" y que "namás apauta los calces llegales pa que los que sí quieran puean espresase n'asturianu".

Ana Cano echó pela idea de que la oficialidá "obligaría a tola Alministración a falar asturianu d'un día pal otru" pero, en cuenta d'ello, aseguró que yá hai munchos funcionarios que puen facelo y que-yos diba costar pocu trabayu". La presidenta de l'ALLA sorrayó tamién la dignificación que diba suponer la oficialidá pal reconocimientu del asturianu nel sistema educativu.

Pela so parte l''asociación Xuristes pol Asturianu emitió tamién ayeri una carta abierta na que pidía al PP que tuviere una actitú decidida a favor del asturianu y na que reconocía que l'actitú d'esta formación va ser decisiva pa que'l derechu de toos de falar n'asturianu se recueya nel Estatutu, ofreciéndose a colaborar col Partíu Popular na busca de soluciones xurídiques afayadices pal reconocimientu del asturianu.