Música asturiana tradicional y remocicada

La música protagoniza dafechu l'ociu d'esti fin de selmana nel nuesu
país. Esti sábadu ye l'estrenu del proyectu "Lucas XV",
una revisión del romanceru asturianu fecha por Xel Pereda y con Nacho
Vegas como cantante. A dambos artistes acompáñenlos Chus Naves
(órganu Hammond y pianu), Manu Molina (batería y percusiones) y
Luis Rodríguez (baxu). Va ser nel Teatru de la Llaboral a les 21:00
hores. El mesmu día pero na Casa la Cultura de Mieres a les 20:00 hores
ye'l conciertu XXV Aniversariu del grupu folklóricu Xorrecer, nel que
van actuar les bandes de gaites Villa de Mieres y Sotorrei, José Manuel
García y Begoña Rodríguez como intérpretes de
tonada, los grupos San Félix de Candás, Xorrecer de Mieres y
Villallana, Skanda, los hermanos Tejedor y Patriband Folk Orchestra.


Yá'l domingu tenemos el conciertu del grupu familiar "Sjuwana
Byers & The Children of God", dientro de la xira qu’entama
Cajastur por cuenta de les feches de Navidá. Sjuwana Byers, compositora
famosa de música espiritual, decidió entamar un grupu colos
miembros de la so familia. Asina ñació "Sjuwana Byers &
the Children of God", un coru auténticu de gospel tradicional
americanu con un soníu soul y de rhythm & blues.Va ser na Ilesia
parroquial de L.luarca a les 19:00 hores. Finalmente va celebráse nel
Teatru Filarmónica 11:45 hores una de les fases eliminatories del XVI
Concursu y Muestra de Folklore “Ciudad de Oviedo”, na qu'amás
el cantatutor tinetense Rafa Lorenazo va presentar el so trabayu últimu
"Primos hermanos". Munches mas actividaes pa esti fin de selmana na
nuesa axenda d'ociu.