La Xunta Xeneral vivió la puesta n'escena de la prórroga presupuestaria

Los grupos parlamentarios de PP y Izquierda Xunida-Bloque por Asturies-Los Verdes na Xunta Xeneral del Principáu d'Asturies (XXPA) unieron ayeri les sos fuercies pa refugar los proyectos de Llei de Presupuestos Xenerales pal 2008 y Midíes Tributaries d'Acompañamientu. El PSOE, qu'apoyó'l proyectu, quedó en minoría, dao que los sos 21 votos nun fueron bastantes pa salvar les cuentes, porque PP (20) y IX-BA-LV (4) sumaron 24. D'esta manera, el proyectu ye devueltu al Executivu y pal próximu añu van tener de prorrogase n'Asturies los del 2007.



La refuga a les cuentes prodúxose na votación relativa a la enmienda de totalidá presentada por IX-BA-LV, dempués de que los dos grupos d'oposición, defendieren les so respectives enmiendes a la totalidá. La Enmienda d'IX-BA-LV diz que'l proyectu de Presupuestos del Gobiernu "nun da respuesta a les necesidaes socioeconómiques y financieres de la Comunidá Autónoma, nin cumple les orientaciones, que tanto en política d'ingresos como de gastos, aprobó nel so día la Xunta".



El representante del PSOE, Fernando Lastra, acusó a les fuercies de la oposición de "pervertir" el debate. Les sos mayores crítiques fueron pa IX-BA-LV, a quien acusó de decidir ya en xunetu refugar el presupuestu, una vez que nun entró nel Gobiernu, al non salir p'alantre les negociaciones con FSA-PSOE. El diputáu socialista dixo qu'hasta CC.OO resaltó'l conteníu "social" de les cuentes y acusó a IX-BA-LV de refugar el presupuestu más social y espansivu "de la historia". Lastra recordó que delles instituciones y organizaciones sociales señalaron bien de vegaes, tamién nel Parlamentu, que ye meyor p'Asturies tener presupuestu que nun tenelu. Dixo que la enmienda d'IX-BA-LV "nun tien nada que ver" cola del PP. "Nel parlamentu ún ye lo que vota", señaló.

Sobre'l PP, comentó que la so refuga a les cuentes ye "dalgo conxénito" y reclamó-yos a los populares que tengan respetu a los presupuestos y a los sos autores. "Ustedes nun cuenten con naide y naide con ustedes, anque pue qu'IX-BA-LV cuente con ustedes pa votar la so enmienda", comentó. Amás, dixo que la decisión del PP va supone-y un "coste políticu" énte la ciudadanía asturiana.

Pela parte del PP, Alejandra Cuétara, criticó que'l Gobiernu nun fuera quién a llevar a la cámara un proyectu colos apoyos necesarios. Criticó que'l proyectu incluya una escesiva presión fiscal pa la sociedá asturiana. "Nesi viaxe nun-yos vamos acompañar", añadió Cuétara.

Per otru llau, dixo que los presupuetos presentaos "fallen dende la base", porque medra más el gastu corriente que l'ingresu, dalgo que calificó de "irresponsable".

Punxo d'exemplu a la Conseyera d'Alministraciones Públiques y vocera del Principáu, Ana Rosa Migoya, por crear "alarmismu" ante'l futuru escenariu de prollongación presupuestaria. "Ye la mentira política del peligru", comentó insistiendo en que'l Gobiernu tenta de 'satanizar' a los grupos parlamentarios que s'oponen a les cuentes.

De fechu, el PP mostró la so "total disposición" p'aprobar nel escenariu de prollongación presupuestaria creitos pa cuestiones que seyan "d'interés pa los asturianos".

Pela so parte, el voceru d'IX-BA-LV, Jesú Iglesias, esplicó que la so refuga débese a la "imposibilidá real" de negociación sobre les cuentes. Fizo una comparanza cola tramitación de los Presupuestos Xenerales del Estáu a nivel estatal, contraponiendo'l talante "negociador" de Zapatero cola actitú mostrada n'Asturies pol presidente del Principáu, Vicente Álvarez Areces.

Sicasí, señaló que los conteníos del proyectu de Presupuestu pal 2008 tampoco dan la talla, ignorando hasta resoluciones de la Xunta Xeneral. Refugó que les cuentes apuesten poles polítiques sociales. "Esti presupuestu ye tacañu y caracterízase porque'l gastu pa los más desfavorecíos nun medre", dixo. Iglesias añadió que'l proyectu va a la escontra les polítiques qu'IX-BA-LV quiso potenciar la pasada llexislatura, cuando taba nel Gobiernu, y refugó amás midíes incluyíes relatives a ayudes directes.

En tou casu, Iglesias mostróse dispuestu a negociar otru presupuestu diferente qu'incluya los sos plantegamientos. En cuanntes al escenariu de prollongación presupuestaria, comentó que'l so Grupu ta dispuestu a aprobar nel Parlamentu toles partíes necesaries pa les necesidaes d'Asturies.
Amás, Jesús Iglesias, mostró la so "sorpresa" pola manera na que se desarrolló l'alderique de güei, dao que nun hubo intervenciones del Gobiernu nin del grupu qu'apoya al Executivu (PSOE), caundo se taba discutiendo la so enmienda. "Ta claro que nin los socialistes tán convencíos d'esti presupuestu, nun-yos importa", señaló.

Sicasí, el voceru del PSOE, Fernando Lastra, dixo que l'alderique de güei tenía'l so propiu procedimientu, ensin que tea contemplada respuesta del Gobiernu. Recordó a Iglesias que'l Gobiernu ya lo defendió nes distintes comisiones presupuestaries.