El CAO abre una canal de comunicación cola UE

Desconocimientu de la situación del asturianu nes instituciones comunitaries y voluntá d'abrir canales de comunicación por parte de les autoridaes llingüístiques de la UE foron les principales impresiones que sacaron Fernando Ornosa y Xulio Casado, representantes de la plataforma Conceyu Abiertu pola Oficialidá, dempués de la entrevista que tuvieron ayeri col comisariu de la UE pal multillingüismu Leonard Orban y el so gabinete

Los pormenores del alcuentru van conocese nuna rueda de prensa que va dase esti miércoles, anque Asturies.com pudo conocer de primera mano la "bona impresión" que llevaron los representantes del CAO, qu'entregaron a los responsables europeos un informe tecnicu y xuridicu sobre la situación del asturianu y un resume de prensa de los últimos 3 años de trabayu del CAO. Na entrevista, que tuvo un calter mayormente informativu, convidóse formalmente a Orban a visitar Asturies, una visita que podría facese realidá nel añu 2009. De cualquier manera, y mientres se concreta esa posible visita, encamentóse a los miembros del gabinete sobre la importancia de que tomaran interés pola cuestion de la llingua asturiana, pulsando opiniones y recoyendo más información. Ello ye que los responsables del CAO conseñaron el gran desconocimientu del asturianu qu'hai dientro de les instituciones comunitaries.

Los responsables del CAO son prudentes a la hora d'albidrar les posibilidaes que s'abren con esta nueva canal de contactu coles instituciones comunitaries. Ello ye que'l comisariu tien cierta influencia y representa una opinión de calidá, pero nun tien capacidá decisoria. En cualquier casu, el contactu d'ayeri con Orban foi'l primeru d'una serie d'ellos que van facese colos órganos de la UE. Los próximos van ser col Conseyu d'Europa y col Parlamentu d'Estrasburgu.