El PP diz que los presupuestos del conseyeru d'Economía d'Asturies "nun son bonos" y IX critica la política fiscal

La diputada del PP, Alejandra Cuétara, recordó güei al PSOE que "un presupuestu nun ye una llei" y añadió que'l so grupu considera que la llei de presupuestos presentada pol PSOE "nun ye bona porque ye inoportuna". "Más val non tener llei que tener una mala", dixo Cuétara, qu'añadió que les cuentes presentaes pol Gobiernu "nin son modernes, nin s'axusten al momentu económicu actual".

Cuétara aseguró que'l gastu medra más que los ingresos y ta comprometiéndose'l futuru.

Amás destacó qu'Asturies "pierde pesu" no que recibe del fondu de compensación interterritorial y nun se compensó per parte del Executivu de Zapatero "tal y como prometiera". La diputada 'popular' criticó tamién la política fiscal de los socialistes y acusó a Rabanal de "faltar a la verdá" sobre les deducciones fiscales referíes al impuestu de sucesiones y donaciones.

Pela so parte, el diputáu d'Izquierda Xunida-Bloque por Asturies-Los Verdes, Jesús Iglesias, destacó la diferencia clara ente los criterios calteníos en material fiscal ente PSOE y IX-BA-LV, y criticó que l'Executivu asturianu nun aproveche'l marcu autonómicu p'avanzar nuna mayor progresión, ya que recordó que los impuestos directos son los que deben definir y estructurar el marcu fiscal.

Iglesias tamién se manifestó a la escontra de la postura caltenida pol conseyeru qu'indicó que la toma de decisiones sobre la fiscalidá verde tien de prollongase nel tiempu. "El céntimu sanitariu tien de sirvir como un bon exemplu y bona esperiencia p'avanzar nes midíes de fiscalidá verde", dixo Iglesias, que tamién pidió más polítiques fiscales que faciliten l'accesu a la vivienda y l'alquiler.

El diputáu de la coalición discrepó tamién nel conceutu de gastu social defendíu pol PSOE y indicó que "nun ye gastu social apoyar a los que nun lo necesiten y tampoco ye social que'l salariu social aumente en sólo ocho euros, nin qu'a un mozu con recursos se-y ayude a mercar un ordenador, o que s'ayude a una familia que nun lo necesita cuando decide tener un fíu".

Esti alderique prodúxose demientres la declaración del conseyeru d'Economía y Asuntos Europeos, Jaime Rabanal, na Comisión d'Economía xunto al restu del so equipu pa dar cuenta de los presupuestos previstos pa la son Conseyería nel 2008.

Nel turnu de fixación de posiciones el diputáu socialista, Álvaro Álvarez, aseguró que les diverxencies d'IX con dalgunos aspectos del presupuestu nun piensa que xustifiquen la refuga al mesmu, ya que'al so xuiciu nun son tantes les diferencies. Si consideró muncho más lloñe la postura del PP, sobre tou no que respecta a la política fiscal.

Álvarez volvió a destacar la necesidá de que'l presupuestu salga p'alantre y manifestó una vez más la disposición del PSOE a negociar el mesmu.

Del diputáu del grupu parlamentariu del PP, Ramón García Cañal, centró parte del so turnu d'entrugues n'interrogar al conseyeru sobre les previsiones d'ingresos al traviés de los impuestos, lo que derivó nuna discusión ente dambos sobre los oxetivos del sistema fiscal y les reducciones de los impuestos. Cañal tamién entrugó poles previsiones d'ingresos del esterior, sobre tou per parte de la comunidá Europea y la execución de los ya recibíos.

La tamién diputada popular Alejandra Cuétara, entrugó a Rabanal poles previsiones pa Gispasa -sociedá que xestiona les obres del HUCA-, asina como pal restu de sociedaes públiques y pol númberu d'elles que tuvieron perdes nel 2006 -l'últimu exerciciu peslláu-, unos datos de los que'l conseyeru nun disponía nesi momentu. Esto provocó dures crítiques per parte de Cuétara qu'afirmó que-y preocupa "que'l conseyeru s'avergoñe d'esos resultaos" y calificó de "falta de rigor" non tener esos datos.

"Queremos que quede claro qu'ustedes o mos remiten esos datos con retrasu o nun mos los remiten, ye dicir, o mos oculta los datos", dixo Cañal, qu'indicó que'l conseyeru debería ponese roxu por esti asuntu. Rabanal insistió en que-y puen facilitar tola información sobre les emprses públiques en cualquier momentu porque se trata de "información pública" y repitió que nesi momentu nun contaba cola información.

Rabanal señaló na Xunta que los oxetivos de les cuentes pal 2008 son "consolidar el crecimentu al traviés de la meyora de la competitividá de la economía, de les sos empreses, que son les que xeneren emplegu y riqueza, y continuar reforciando'l bienestar social. Nesta ocasión el presupuestu sube a 4.180 millones d'euros, lo que supón un crecimientu del 7,22% y un total de 3.880 euros por habitante.