El concursu de cómic de la comarca de la sidra entrega los sos premios

El Xuráu de la V edición del Concursu de Cómic y III de Tires Cómiques n'Asturianu "Comarca de la Sidra" dio-y na modalidá de mayores de 14 años, el primer premiu dotáu con 500€, al dibuxante Alfonso Zapico Fernández pola obra titulada "Les Cuentes de Gasparín"

Alfonso Zapico, (Blimea, 1981) ye una de les realidaes con más sonadía del cómic asturianu. Diseñador gráficu, trabaya, pa con otros llabores, como ilustrador na editorial Edelvives, pa la que tien iguaos 9 llibros de testu de primaria y secundaria. De los premios algamaos por esti artista, rescampla enforma'l llográu esti añu na feria FestiBd, en Ville de Moulins, Francia, al meyor trabayu de calter históricu, pol so álbum "La Guerra Del Profesor Beltenev", publicáu en Francia, Bélxica, Suiza y Canadá países nos que tamién asoleyó l'álbum "Un día de mayu" n'andecha con otros autores. Anguaño trabaya nuna novela gráfica, "Café Budapest", que va espublizase pal añu que vien. N'asturianu, ye l'autor de la serie "Manolita Pulgarcita" qu'apaez en "El Gomeru".

Xunto col primer premiu, el xuráu formáu por Pablo Maojo, Xuan Pedrayes y Arancha Prado, decidió dar dos accésit de 200 euros y diploma a les historietes ¿otru culín? De Juan Miguel Borja Estevez y "Milagru na Canga" de José Juan González García". Amás del premiu en metálico y los diplomes pa los tres ganadores, la organización va editar una publicación na que van tar recoyíes estes obres.

El Xuráu repartió tamién los premios nes estremaes categoríes pa escolinos de la comarca de la sidra. Delles obres escoyíes, van formar parte d'una esposición itinerante pelos diferentes centros culturales de la comarca de la Sidra, que va finar pel mes de marzu de 2007.

L'actu d'entrega de premios, publicación y esposición de les obres presentaes a concursu, va celebrase'l miércoles 5 d'avientu na Casa Cultura "Marta Portal" de Nava, a les 19:00 hores y va contar cola comunicación "Historia del Cómic n'Asturianu", por Chechu García, y l'actuación del grupu "Xentiquina".