Migoya acusa a De Lorenzo de facer demagoxa col asturianu

La conseyera d'Alministraciones Públiques y Portavoz del Gobiernu, Ana Rosa Migoya, aseguró esti fin de selmana que l'Ayuntamientu d'Uviéu "una mostró interés nengún" nel desarrollu del Plan de Normalización Social del Asturianu, polo que calificó de "demagóxica" la postura del alcalde, Gabino de Lorenzo pidiendo un esfuerzu pola llingua pa qu'esta nun desapaeza y criticó que "venga agora a dar lecciones" sobre lo que tienen que facer otros cuando'l Gobiernu asturianu, según Migoya, "lleva trabayando munchos años y con munchu rigor".

Migoya declaróse "sorprendida" de que l'alcalde d'Uviéu "s'acuerde agora" de la protección y promoción del asturianu y aseguró que l'uvieín tuvo una oportunidá na pasada llexislatura p'amestar el so conceyu a la campaña de reforma de los topónimos y que foi de los pocos conceyos que nun la solicitaron".

Migoya recordó que n'avientu del 2006 había convocada una reunión colos ayuntamientos y qu'Uviéu nun acudió a la mesma, asegurando que'l Gobiernu asturianu nun supo más d'Uviéu dempués d'aquello, dalgo que pa la conseyera rescampla cola actítú de la mayoría de los ayuntamientos asturianos que tomaron la iniciativa y echaron a andar servicios de normalización llingüística y que collaboren col Principáu nesti sentíu.

Migoya defendió lo que calificó de "evidente esfuerzu" del executivu asturianu en materia de promoción y protección del Asturianu, sorrayando l'aprobación del Plan de Normalización y la xuba de los presupuestos acutaos pa política llingüística, que dixo que foi d'un 20% al añu, cola promesa d'otru 25% pal añu qu'entra.