L'Entregu celebra un festival folclóricu y la fiesta de les cebolles rellenes

L'Agrupación d'Etnografía y Folclor "L'Esperteyu" va celebrar esti fin de selmana, coincidiendo cola Fiesta de Les Cebolles Rellenes, el so XII Festival Folclóricu, al que van asistir los grupos de baille tradicional d'Asturies L'Esperteyu, L'Enguedeyu, Les Ayalgues y El Piñote, el grupu Pontenova de Pontevedra y les bandes de gaites El Piñote y Pontenova.

Col festival d'esti añu l'Agrupación Folclórica "L'Esperteyu", comprometida coles raíces populares asturianes y col pueblu de L'Entregu quier esparder per tola xeografía entreguina l'ambiente de fiesta y contaxar del mesmu a la población y a los que s'alleguen a la fiesta. Nesti sentíu, l'Agrupación fai un convite pa que la xente s'anime a participar, bien vestida d'asturianos, bien baillando aquelles pieces que sean abiertes a la collaboración pública. La organización comenta que, siempre que l'agua nun estropie los planes, van recorrese barrios y zones tán distantes como Fradera, Japón, La Vega, San Vicente o la Plaza de la Ilesia.

El programa d'actividaes entama'l xueves 29 de payares a les 18:00 h cola misa n'honor de San Andrés de Llinares, Patrón de L'Entregu. Ya'l sábadu 1 d'avientu, dende les 11:3o a les 14:oo h, los grupos participantes van desfilar pel conceyu, treslladándose l'actividá a la Plaza d'Abastos en casu de llover. Esi mesmu sábadu, dende les 16:3o a 17:45 h va haber pasucais y actuaciones per L'Entregu que van treslladase de 18: oo a 20:3o al Centru Comercial Valle del Nalón. El domingu 2 d'avientu, dende les 11:3o a 14:oo los grupos van actuar pel Barriu de San Vicente.