Los alumnos asturianos algamen una puntuación en Ciencies penriba de la media de la OCDE

Los asturianos algamen una puntuación en Ciencies de 508 puntos, penriba del promediu de los países qu'integren la Organización pa la Cooperación y el Desarrollu Económicu (OCDE), según consta nel informe PISA 2006, adelantáu pola revista 'Magisterio' y recoyíu pola axencia Europa Press.

Según dichu informe, los alumnos d'Asturies tán nesta materia al nivel de Suiza, Austria, Bélxica o Irlanda, y ocupen el quintu puestu en cuantes a los meyores resultaos algamaos nes diez comunidaes autónomes analizaes.

La revista señala que los resultaos del informe confirmen "la existencia de delles velocidaes n'España con problemes de desequilibriu territorial en materia educativa".

Asina, Castiella y Llión y La Rioxa encabecen los resultaos del informe na escala de Ciencies asitiándose dambes nos 520 puntos. Tán dalgo perbaxo de los Países Baxos (525), pero penriba d'Eslovenia (519) y de clásicos como Alemaña (516) o'l Reinu Uníu (515).

Más p'alantre ta Aragón (513 puntos), Navarra (511), Cantabria (509), Asturies (508) y Galicia (505). Estes comunidaes tán al nivel de Suiza, Austria, Bélxica o Irlanda, y penriba tanto de Suecia (503) como'l promediu de la OCDE.

Ya perbaxo del promediu de la OCDE, pero penriba de la media española (488), tán País Vascu (495 puntos ) y Cataluña (491). El País Vascu "meyoró muncho" los sos resultaos en Ciencies con respecto al 2003, al ganar once puntos, mientres que Cataluña, que nesta escala taba a la cabeza d'España, per nueve puntos y sólo queda per delantre d'Andalucía.

Andalucía (474 puntos) ye la comunidá que ta n'últimu llugar de les presentaes perbaxo la media española, al mesmu nivel de Portugal.