Gabino de Lorenzo afirma que “nun podemos dexar que desapaeza l’asturianu”

L'alcalde d'Uviéu, Gabino de Lorenzo, declaró ayeri que la llingua asturiana tien falta de "munchísima más atención de la que se-y presta". Nunes declaraciones que fexo na inauguración d'un rastru benéficu, l'alcalde de la capital asturiana aseguró que "l'asturianu ye un patrimoniu d'esta rexón que necesitaría munchísima más atención de la que se-y presta" y remachó que "llevo diciéndolo tantes veces como tengo oportunidá de dicilo". De Lorenzo afirmó que "nun se pue dexar desapaecer una forma na que s'espresaron los nuestros antepasaos, y a la que si nun-y prestamos l'atención debida va perdese". "Ye una bayura cultural que nun tenemos nengún derechu a abandonar a la so suerte" esplicó Gabino de Lorenzo.