Xuristes pol asturianu fai alcordanza de Xulio Diego González Campos

El día 20 del mes de payares morrió en Madrid el que foi miembru del Tribunal Constitucional D. Julio Diego González Campos, caderalgu de Derechu Internacional de la Universidá d'Uviéu allá pelos años 70. El colectivu "Xuristes pol Asturianu" emitió con motivu d'esti fallecimientu una nota na que "quier dexar constancia d'esta perda y acordase de que foi elli, xunto con otros dos Maxistraos d'esi Tribunal, el que dixo na primera Sentencia sobre'l casu "Andecha Astur" y nun votu particular, que la llingua asturiana yera una llingua bien afitada n'Asturies".

Nuna segunda sentencia sobre esti casu qu'afitó'l derechu a presentar llistes electorales n'asturianu, y dando-y la razón a aquel partíu políticu, el xurista desapaecíu dio l'amparu pidíu y dixo que podía presentar la so candidatura a les eleiciones xenerales n'asturianu.

Xuristes pol asturianu recuerda que "Que sepamos, hasta agora, ye l'únicu poder públicu que fizo una interpretación de la Constitución, del Estatutu d'Autonomía y de la Llei d'usu y promoción del bable/asturianu bonal y favoratible a la so aplicación cola mayor amplitú posible" y llamenta que "nesta domina na que vivimos d'acometimientu a la nuestra llingua dende toles estayes del poder (…) creemos que ye bon momentu p'acordanos d'esti malagueñu y llamentar que ya nun tea ente nosotros. A títulu particular, dellos miembros del colectivu faen tamién alcordanza de González Campos como un de los sos maestros de referencia cuando estudiaron la carrera de Derechu y como un positor al réxime franquista.