Estrénase’l documental «El Astillero» nel Festival de Cine de Xixón

El Festival de cine de Xixón presenta esta tarde la estrena de la cinta "El Astillero (perdonen las molestias)" una producción que va poder vese en Teatru Xovellanos de Xixón a les 5 de la tarde. El documental lleva la firma d'Alejandro Zapico y nelli participaron el director de cine Fernando León (los lunes al sol) y la guionista Lola Salvador. La intención d'esti documental que recueye la llucha de los obreros de Naval Xixón, una historia que los productores describen como "un capítulu más, tal vez ún de los últimos, de la llucha contra'l desmantelamientu industrial d'una rexón, Asturies, en continua reconversión" y que quier sertamién "una historia de sindicalismu, de reivindaciones, de solidaridá, pero, sobre too, ser la historia d'unos homes que nun quedaron solos na so llucha pola supervivencia y la xusticia.

El trabayu pa esti documental entamó nel añu 2000 col despidu de doscientos eventuales, y recueye la evolución del conflictu llaboral casique permanente del astilleru hasta l'encarcelamientu y lliberación de los sindicalistes Cándido y Morala nel 2007, recoyendo les intenses asamblees sindicales, les movilizaciones y enfrentamientos cola policía, y el trabayu nel astillero, anque'l director sorraya la importancia del documental en que-yos da la palabra a unos trabayadores que lleven conviviendo cola solombra de la reconversión industrial dende va décades.

Esta mesma tarde, y a la mesma hora, a les 17:00 hores, na sala 1 de Cines Centro, van pasase les cintes de "Día d'Asturies" sección centrada en realizadores asturianos. Nella van proyectase los curtios "Prisas", de Julio de la Fuente, "Tres versiones" de Pablo A. Quiroga, "Club cariño.com" de Benjamín Requejo, "Escucha!" d'Isaac Baizán, "Ausencia" de Pelayo Muñiz, "Pepita" d'Alicia Guirao y Blanca Nieto, y "En primera persona del plural" de Claudia Lorenzo.