El Premiu d’Ensayu Máximo Fuertes Acevedo declárase ermu

Dempués de que la selmana pasada se declarare ermu'l Premiu de Novela "Xosefa Xovellanos", que tolos años entama la Conseyería de Cultura y Turismu del Principáu d'Asturies, el xuráu del Premiu d'Ensayu "Máximo Fuertes Acevedo" centráu nel ensayu, decisió tamién declarar ermu'l premiu, al que namás se presentaren trés obres de les que nenguna tenía méritos abondos, al paecer del xuráu, pa llevar el premiu.

Dase la circunstancia de que nun ye la primer vegada que'l Fuertes Acevedo queda ermu. Esti premiu d'ensayu nun se convocaba dende l'añu 2002 precisamente pol baxu volume de trabayos que se presentaben a la convocatoria. Sicasí, nun intentu por da-y vida otra vegada, el xuráu pide que se-y dea continuidá a la convocatoria.

De los cuatro premios a la creación n'asturianu que convocaba Cultura esti añu, namás queda por conocese'l Xuan María Acebal de Poesía, que quedare ermu na so convocatoria del 2006. El de periodismu foi pa Miguel Solís Santos, y el Xosefa Xovellanos de narrativa quedó ermu dempués de que solo se presentaren dos trabayos.