El Conceyu Abiertu pola Oficialidá llama a una xornada de movilización pol asturianu

El Conceyu Abiertu pola Oficialidá fai esti sábadu un fuerte apueste pola movilización a favor del reconocimientu del asturianu nel estatutu d'autonomía. Dende primer hora de la mañana, una serie de marches cíviques van salir andando dende La Felguera, Mieres, Siero, Avilés, Xixón y Trubia, que va ser la última en salir. L'oxetivu de toes elles ye llegar a Uviéu pa, a les seis de la tarde, axuntase a la gran manifestación pola oficialidá del asturianu que va salir a les 6 de la tarde de la estación de la Renfe de la capital asturiana.

Los avilesinos tan llamaos a salir dende 9:00 hores n'El Parche, mientres que la marcha de Xixón va salir a les 9:30 na Gasolinera "Foro". Del Parque vieyu va salir a les 11 la marcha de La Felguera y dende les places de los ayuntamientos van salir a les 12:30 les marches de Mieres y la Pola Siero. Los trubiecos van facelo dende les 12:00 na retonda l'institutu.

La organización del CAO quier qu'esta sía la mayor manifestación de la historia a favor del asturianu, y llama a la participación recordando'l momentu históricu que se vive col procesu de reforma del estatutu d'autonomía. Los grupos políticos representaos na Xunta Xeneral son los destinatarios del mensaxe que va dase'l sábadu pela tarde peles cais d'Uviéu, y ello ye, como recuerda'l CAO "que tienen na so mano resolver la cuestión llingüística n'Asturies". La plataforma píde-yos a PSOE, PP y IX-BA-LV que "nun vuelvan tapar los güeyos a la realidá pensando qu'asina'l problema va desapaecer" y "Qu'asuman la so responsabilidá histórica y escuchen a los ciudadanos d'a pie, de tolos colores políticos que vienen a reclama-yos que nesta prósima reforma del Estatutu d'Autonomía pongan les bases llegales pa que los derechos llingüísticos de tolos asturianos y asturianes sean reconocíos y respetaos".



Una banderona d'Asturies va encabezar la marcha, siguida de la pancarta principal, sostenida poles siguientes persones confirmaes: Ana Cano (presidenta de l'Academia de la Llingua Asturiana), Maxi Rodríguez (actor y guionista), José Ángel Hevia (gaiteru), Amador Rodríguez (presidente de la Federación d'Asociaciones de Vecinos de Xixón), Francisco Llera (catedráticu de socioloxía de la Universidá del País Vascu), Berta Piñán (escritora), Ramón Lluis Bande (periodista), Pilar Quintana (colombiana presidenta de l'asociación Asturias Acoge), Chus Pedro (vocalista de Nuberu) y Xurde Blanco (de l'asociación de Xuristes pol Asturianu), anque nos próximos díes puen sumase otros nomes. Tres d'ellos va desfilar una bandona de gaites en si bemol y tres d'ella una segunda pancarta de políticos y sindicalistes, a la que va siguir tol cortexu d'asistentes. La manifestación va rematar na Plaza Porlier, onde va actuar el grupu Folk La Bandina, tres la llectura d'un comunicáu.