Xuristes pol asturianu denuncia la situación de la llingua énte'l Conseyu d'Europa

El grupu de xuristes y abogaos concienciaos pol reconocimientu de la llingua asturiana "Aconceyamientu de Xuristes pol Asturianu" fizo público nun comunicáu de prensa l'unviu d'una denuncia presentada énte'l Conseyu d'Europa y na que se da parte del incumplimientu de la Carta Europea de les Llingües Rexonales o Minoritaries n'Asturies.

Nel so informe, Xuristes pol Asturianu denuncia "L'escaecimientu cásique dafechu de la llingua asturiana nos informes que fai'l Gobiernu Español al Conseyu d'Europa sobre'l cumplimientu n'España de la Carta". Na so denuncia, Xuristes asegura que nesti informe, llegóse nel añu 2006 al estremu "de que nes 506 páxines qu'ocupa, namás se faen dos curties referencies a la llingua de los asturianos: la primera, na páxina 12, pa sofitar que "El procesu de normalización y codificación del asturianu nun ta afitáu dafechu" y la segunda, páxina 41, p'afirmar que "Respective al bable o asturianu, nun se dispón de nuevos datos sobre los axuntaos nel primer informe, presentáu nel 2002, polo que se vuelven a mandar los datos suministraos pola Encuesta d'Usu Llingüísticu fecha en 1991". Ello ye qu'existe una segunda encuesta sociollingüística realizada nel 2002 pol mesmu equipu de Francisco Llera Ramo que fexo la primera de 1991.

Xuristes denuncia igualmente como n'aplicación d'esta discriminación l'asturianu ta marxináu "nes 84 normes estatales de toa triba, dende lleis orgániques a resoluciones, que l'Estáu español presenta al Conseyu d'Europa como desendolcu de la Carta Europea de les Llingües Rexonales o Minoritaries n'España". El colectivu asegura que "de tales 84 normes discriminatories pa col asturianu, estudiaes y denunciaes, 27 cinquen al sistema educativu y les demás repártense pente l'emplegu xudicial, alministrativu, nos medios de comunicación y n'otres estayes". El colectivu concluye que la llingua asturiana "despreciada polos partidos políticos mayoritarios n'Asturies y ensin más valedores que febles y voluntaristes movimientos ciudadanos, ensin una intervención decidida y urxente de les instituciones comunitarias, pasará a ser la primera llingua europea que s'esmuz a les puertes del Conseyu d'Europa".