Migoya diz que la fuelga nel hospital del Oriente ye política

"La Conseyera d'Alminitraciones Públiques y vocera del Gobiernu, Ana Rosa Migoya, aseguró ayeri que la fuelga plantegada nel Hospital del Oriente (Parres) respuende sólo a ""criterios políticos y oportunistes"" énte la proximidá d'una cita electoral, porque les reivindicaciones que se planteguen ""nun son d'ámbitu llaboral y nelles lo que más importa son los intereses particulares y hasta partidistes"".

Al so xuiciu ta ofreciéndose una imaxe ""deformada"" y ""falsa"" de lo que güei ye l'hospital. Según informaron fontes del Principáu al traviés d'una nota prensa, la conseyera, tres caltener un alcuentru col alcalde de Parres, Manuel Millán, acusó a los convocantes de los paros nel Hospital Francisco Grande Covián de tar ""metiendo mieu a los usuarios en mensaxes catastrofistes que nada tienen que ver cola realidá"". Nesti sen, la vocera del Gobiernu mostró dellos documentos nos que s'espeya que la situación del centru sanitariu ""ta lloñe de ser la que dalgunos tenten de treslladar col únicu oxetivu de confundir"". La vocera del executivu asturianu esplicó que la evolución del hospital dende 1997 foi ""permanentemente positiva"" en tolos parámetros. Dende'l puntu de vista financieru, señala que'l conciertu económicu pasó de 7,7 millones hai diez años a 10,2 a últimos del 2007. A estes cantidaes, añadió'l plan d'inversiones pal 2008 aprobáu pol Patronatu de la Fundación el pasáu 14 de febreru y que supón 325.000 euros destinaos a la meyora del área materna infantil; farmacia, y la primer fase de la modernización del área d'urxencies. Tamién dixo que'l crecimientu de la plantiya en toles categoríes, foi ""espectacular"", aumentando un 106 por cientu al pasar de 136 trabayadores en 1997 a 281 a finales del pasáu añu. Amás, el 98,2% de la plantiya tien un contratu fixu indefiníu, ""lo que torna a esti hospital nel centru sanitariu con mayor estabilidá llaboral d'Asturies"".

Migoya dixo qu'esos parámetros tuvieron la so trescendencia sobre l'actividá asistencial del centru no que cinca a hospitalización, serviciu d'urxencies, actividá quirúrxica y actividá ambulatoria, aumentando los ingresos y l'actividá quirúrxica hasta superar les 2.500 operaciones, y les consultes ambulatories superen les 67.500 al añu. ""Que nun tenten de confundir a los ciudadanos montando una especie de circu na cai"", dixo Migoya. ""Solicitamos un poco más de respetu a los usuarios y ciudadanos d'esta comarca qu'ensin duda dalguna nun son fatos y saben cómo funciona esti hospital"", finó la conseyera."