CC.OO, CSI-CSIF y Suatea convoquen al profesoráu a una concentración el día 28 escontra la Carrera Profesional

Los sindicatos de CC.OO d'Enseñanza, CSI-CSIF y Suatea anunciaron güei la convocatoria pal próximu día 28 d'una concentración escontra l'aplicación de la carrera profesional. La manifestación, a la que ta convocáu'l personal docente asturianu, va tener llugar el citáu día a les 18.00 hores delantre de la Conseyería d'Educación n'Uviéu. En rueda de prensa, el secretariu xeneral d'Educación de CC.OO, José Luis García, declaró que'l llevantamientu de la suspensión cautelar de la Carrera Profesional ye un "parche" provocáu pola alministración asturiana pa que puedan cobrar los firmantes de la resolución del 22 de mayu.

"Queda un númberu importante de docentes sobre un 10 por cientu, a los que nun se-yos soluciona nada", declaró García. El representante de CC.OO tamién manifestó que l'autu de llevantamientu sigue "dexando nel aire" la llexitimidá del procedimentu hasta que'l tribunal se pronuncie sobre'l fondu del asuntu. Los sindicatos manifestaron que, a pesar del llevantamientu de la suspensión cautelar, continúen coles mesmes oxeciones plantegaes dende l'entamu sobre la resolución.En concretu, pa estes organizaciones la Carrera Profesional supón un "chantaxe inalmitible" sobre'l profesoráu al que se-y pide la firma en blancu sobre los compromisos futuros.

La secretaria de Suatea, Beatriz Quirós, manifestó que n'Asturies, "por decisión unillateral" del Gobiernu, nun existen les meses sectoriales de negociación. "Lo que-y pidimos a l'Alministración ye qu'abra víes de negociación que nun dexen al profesoráu asturianu a la cola retributiva", declaró Quirós.
El representante de CC.OO lligó'l pagu del primer tramu de la Carrera Profesional, previstu p'avientu, cola "cercanía" del procesu electoral. "La conseyera d'Alministraciones Públiques xuega colos sos servicios xurídicos por tener cerca les elecciones", afirmó García.

Pela so parte, el sindicatu UXT, que defendió dende un principiu la carrera profesional, pidió-yos a les demás centrales, en sabiéndose del llevantamientu de la suspensión cautelar de la mesma, que retiraren los sos recursos.