Cultura compromete un segundu plan de normalización del asturianu

La conseyera de Cultura y Turismu, Encarnación Rodríguez, presentó ayeri'l proyectu de presupuestos pal so departamentu. Pa la responsable de Cultura trátase d'un presupuestu que con cerca de 150 millones d'euros pretende afitar les polítiques de l'anterior llexislatura, completar y construyir equipamientos na busca del equilibriu territorial y reforciar la promoción turística y cultural del Principáu tantu a nivel nacional como internacional. Xunto a Rodríguez fueron a la presentación tolos responsables de la Conseyería, ente elles la directora xeneral de Promoción, Consuelo Vega, qu'esplicó que dientro de les actuaciones previstes, destaca'l segundu plan de normalización del asturianu. Actualmente ta realizándose la evaluación del grau de cumplimientu de los oxetivos del primeru, al empar que se ta prepara'l borrador del segundu plan p'afondar y avanzar nel proyectu.

En cuantes a la previsión de la Conseyería nel casu de tener d'afrontar una prórroga presupuestaria pola falta d'apoyos del proyectu, la conseyera dixo que la mesma diba afectar al desarrollu de los proyectos, pero señaló qu'esti nun ye'l momentu de pensar neso, sinón el de defender l'aprobación de la propuesta. Cultura y Patrimoniu Cultural van disponer del 54 por cientu del presupuestu; promoción de Deportes y Eventos Deportivos y Festivos va tener el 19 por cientu; Turismu el 21 por cientu y Mocedá el seis por cientu. Ente les arees que dependen de la Conseyería, son Turimu (32 millones), Deportes (27,8 millones) y Promoción Cultural (21,6 millones d'euros), les direcciones xenerales que van disponer de mayor presupuestu. De la mesma manera, Turismu ye la que rexistra un mayor incrementu de les sos partíes, con un 54,72 por cientu. Patrimoniu Cultural va contar con un presupuestu de 17,78 millones y un incrementu de la cuantía de 11,94 por cientu; l'Axencia pal Desarrollu de Proyectos Culturales va contar con 39 millones d'euros y un aumentu de la cuantía de 26,23 por cientu; y l'Institutu Asturianu de la Mocedá va tener a la so disposición 8,4 millones d'euros, con una xuba del 5,65 por cientu.

Ente los proyectos del Institutu Asturianu de la Mocedá pal próximu exerciciu, la Conseyería destacó la ellaboración del Plan de Mocedá que se prevé concluyíu nel primer semestre del 2008.

Al traviés d'esti estudiu, l'Institutu pretende disponer d'un perfil realista de la mocedá asturiana y les sos necesidaes.

Los dos proyectos con mayor inversión prevista pola Conseyería pal 2008 son el Muséu de Belles Artes d'Asturies, n'Uviéu, con una partida de 11,2 millones d'euros, de los más de 25 millones que supón la totalidá del proyectu, y los 10,15 millones de la Ciudá de la Cultura, en Xixón. Otros proyectos relevantes que va desarrollar la Conseyería van ser el Centru Deportivu Fernando Alonso, en Llanera, por dos millones d'euros; la Ciudá del Motor de Tinéu, por dalgo más de 420.500 euros; la campaña de promoción turística d'Asturies, con 4.156 millones d'euros; los planes llocales de turismu, con 3,7 millones; y el proyectu Puertes d'Asturies, en L.lena, con un presupuestu de 2,5 millones d'euros.


Los proyectos culturales más trescendentes pal próximu añu, van ser, según la conseyera, el Centru Cultural Óscar Niemeyer, n'Avilés, que va contar con un presupuestu de tres millones pal entamu d'execución de les obres, l'Archivu Históricu, n'Uviéu, con dalgo más de 400.000 euros; el Muséu Arqueolóxicu, n'Uviéu, con 350.000 euros; la conversión en muséu de la cueva del Pozu'l Ramu, en Ribeseya, con un millón d'euros; los equipamientos culturales en dellos conceyos de la comunidá, con cerca de tres millones, y les obres de conservación del Monasteriu de San Salvador, en Curniana, con más d'un millón d'euros.