La UE autoriza la comercialización del quesu d’Afuega‘l Pitu con Denominación d’Orixe

La Unión Europea autorizó esta selmana la comercialización del quesu "Afuega 'l Pitu" con denominación d'orixe protexida. L'autorización tien que pasar agora seis meses n'información pública y, en pasando esi plazu, va entrar con tol reconocimientu nel rexistru de marques de la Unión Europea con Denominación d'Orixe.

La decisión de la UE reconoz cuatro variedaes o menciones tradicionales d'esti quesu, l'atroncáu blancu; y el roxu, les de trapu blancu y roxu, siendo les variedaes roxes les que lleven pimentón de colorante y especificando que, naquelles especialidaes de menos de 60 díes de curación, nun va ser requisitu imprescindible la pasterización del lleche.

La zona xeográfica qu'acuta la DO abarca los conceyos de Morcín, Riosa, Santu Adrianu, Grau, Salas, Pravia, Tinéu, Miranda, Cuideiru, Candamo, Les Regueres, Muros del Nalón y Sotu'l Barcu por tratase de les árees onde se desarrollen toles fases d'ellaboración del quesu, incluyida la producción del lleche que s'emplega como materia prima.