El PP denuncia la mala xestión de los fondos mineros

"El diputáu del PP na Xunta Xeneral, Ramón García Cañal, criticó güei al executivu asturianu por ""nun tener idees nin proyectos"" nos qu'invertir los Fondos Mineros y acusó al presidente del executivu asturianu de disviar cerca de 350 millones d'euros pa otres polítiques diferentes de les incluyíes nos planes de la minería.

Cañal realizó estes manifestaciones na rueda de prensa qu'ofreció pa denunciar l'incumplientu de l'adicionalidá de los Fondos Mineros.

El responsable popular alvirtió de que queden pendientes 700 millones -400 del Plan de la Minería de 1998/2005 y 342 millones de les dos primeres anualidaes de los años 2007/2007- ensin invertir. ""Nun se sacó a subasta nenguna obra y tovía queden por firmar convenios"", aseguró Cañal.

El diputáu mostró les diferentes partíes presupuestaries dedicaes a les inversiones de los presupuestos del Principáu en carreteres y alertó que'l Gobiernu del Principáu tien previstos 130.100.000 millones d'euros pal 2008, ""la mesma cantidá que destinara en 1999 (126.383.530 millones)"".

Cañal dexó claro qu'ente los años 2000 y 2004 les inversiones de los presupuestos del Principáu en carreteres algamaron cifres cercanes a los 190 millones d'euros, mientres que dende Zapatero llegó al poder nel 2004 les inversiones baxaron a una media de 140 millones d'euros.

El diputáu popular aseguró que nel 2008 según el Plan de carreteres del Principáu 2000-2010 debería d'invertise una media añal colos Fondos Mineros de 185 millones d'euros, ya que la inversión media añal propia del Principáu debería ser 122 millones d'euros.

García Cañal señaló que la política del PSOE respecto a la inversión de los Fondos Mineros ""ye escandalosa"" y pa ""garrar y marchar"". Recordó que los sindicatos tovía nun s'aconceyaron col executivu central ""a pesar de que s'anunciara'l conceyu pa enantes del branu del 2007"".

Nesti sen, Cañal denunció que los socialistes tán ""mareando"" a los sindicatos y a los ayuntamientos pa ""non ponese a ello"" porque ""nun existe nenguna idea pa invertir los cientos de millones"". El responsable del PP aprovechó tamién pa criticar les propuestes de dalgunos ayuntamientos que proponen colos Fondos Mineros construyir ""una bolera, un tanatoriu o un campu de tiru al platu"", dixo. ""Esto ruempe col principiu d'adicionalidá"", añadió.

El diputáu dixo qu'hai que comparar esta política cola del Gobiernu del PP en 1997 cuando se realizaron llistaos d'inversiones, se buscaron d'alcuentru colos sindicatos y colos ayuntamientos y se desarrollaron. ""El Principáu adelantóse, contrató proyectos d'obres y cuando se firmaron los convenios de los proyectos ya taben firmaes eses obres poles empreses pa entamar a trabayar"", apuntó Cañal."