100.000 sobres d'azucre anuncien la manifestación pola oficialidá del día 24 en chigres y restoranes

Un total de 100.000 sobres d'azucre tán repartiéndose per establecimientos hosteleros de toa Asturies nos que s'anuncia la manifestación pola oficialidá de la llingua asturiana convocada pal próximu día 24 de payares n'Uviéu.

Trátase d'una campaña desarrollada pol Conceyu Abiertu pola Oficialidá (CAO), organización integrada por más de 200 partíos políticos, colectivos y agrupaciones deportives, vecinales y sociales que reivindica la oficilidá de la llingua.

La iniciativa presentáronla ayeri a los medios el representante del CAO, Fernando Ornosa, y miembros de la Xunta pola Defensa de la Llingua, grupu integráu nel Conceyu. Según Ornosa, los sobres ya se repartieron por dellos conceyos d'Asturies. Ente ellos mencionó'l casu de Cangas del Narcea, conceyu nel que "dellos negocios mos llamaron pa pidimos más sobres porque los que-yos llevamos ya los acabaron". Del mesmu mou, repartiéronse n'Uviéu, Xixón, Avilés, Valdés, Siero y L.lena, "y nes dos próximes selmanes vamos siguir n'otres zones". "Tamos pensando tamién en sacar una edición de sacarina", añadió.

Nos sobres anúnciase la convocatoria de la manifestación, que va salir a les 18.00 hores de la Estación del Norte d'Uviéu, y va finar na Plaza Porlier. El mesmu día, a primer hora de la mañana van salir seis marches a pie dende Avilés, Xixón, Siero, Llangréu, Mieres y Trubia. Toes elles van xuntase nel puntu de salida del actu reivindicativu a la hora indicada.

Ornosa xustificó esta nueva convocatoria na "necesidá de que la llingua asturiana se reconoza como oficial na próxima reforma del estatutu d'Autonomía d'Asturies". "Ye la única ferramienta llegal que garantiza la supervivencia del idioma", manifestó, al tiempu que recordó que "hai dos partíos mayoritarios (en referencia a PSOE y PP) que tienen el deber de garantizar esti derechu civil y esti patrimoniu con más de 1.000 años d'antigüedá". "Esta demanda tien l'amparu de la Constitución Española" afirmó Ornosa, qu'agradeció de la mesma manera a los hosteleros d'Asturies "la so collaboración y el so apoyu con esta reivindicación", lo cual, al so xuiciu, "demuestra que la causa cuenta col apoyu de munchos colectivos de tou tipu".