Paz d'Andrés tamién fai apueste pol asturianu na carrera al rectoráu

"L'asturianu va tar presente na campaña electoral pol rectoráu de la Universidá d'Uviéu. Dempués de conocese que l'aspirante Vicente Gotor caltién nel so programa'l decálogu a favor del asturianu que yá aceptare va cuatro años cuando s'enfrentó a Juan Vázquez, agora ye la caderalga de derechu, Paz d'Andrés, la que xube l'apueste pola asturianización de la Universidá cola anuncia d'un compromisu nel so programa ellectoral.

N'antoxana del so programa ellectoral, Paz d'Andrés recuerda que ""El venceyamientu de la Universidá d’Uviéu col rodiu social y cultural asturianu tien una llarga hestoria y entama a lo cabero del sieglu XIX"" n'alcordanza al grupu de profesores asturianistes creadores de la “Estensión Universitaria” asegurando darréu que ""la candidatura de nueso siéntese heriede d’aquellos hestóricos enfotos y quier contribuyir programáticamente a afitar la llingua y la cultura asturianes nel ámbitu universitariu"". Asitiando la so reivindicación asturianista dientro del marcu llegal que da l’Espaciu Européu d’Educación Superior (EEES) que califica de ""oportunidá inmeyorable pa encadarmar académicamente los estudios de la llingua y la filoloxía asturianes"" l'equipu de Paz d'Andrés mira tamién pal marcu llegal que dan l'Estatutu d’Autonomía d’Asturies, la Llei d’Usu del Asturianu, y los Estatutos de la mesma Universidá d’Uviéu, pa reivindicar como ""xeres propies de la Universidá"" la realidá y l’ámbitu d’Asturies asina como que la llingua asturiana sía ""oxetu d’estudiu, enseñanza ya investigación nos ámbitos que correspuendan, dándose seguranza de la non discriminación de quien la emplegue"".

Esta declaración de principios espéyase nuna riestra de midíes a llevar alantre dende'l rectoráu qu'incluyen, por exemplu, que los estudios de Llingua Asturiana empobinaos a la formación del futuru profesoráu qu’ha impartir esa enseñanza na estaya d’Educación Primaria s'inxeran dientro de la estructura del Grau de Maestru d’Educación Primaria, n’igualdá de condiciones que’l restu de “menciones” que se contemplen y que los estudios de Llingua Asturiana empobinaos a la formación del futuru profesoráu qu’ha impartir esa enseñanza na estaya d’Educación Secundaria y Bachilleratu s'inxeran dientro de la estructura del títulu de Grau de la Facultá de Filoloxía que correspuenda, de mou paralelu a les posibilidaes contemplaes pa otres llingües y filoloxíes de la tradición universitaria. D'otra manera, no que cinca al usu y dignificación de la llingua asturiana nel contestu universitariu l'equipu de Paz d'Andrés propón ""Facilitar, acordies col marcu llegal, la tramitación oral y escrita n’asturianu d’asuntos que cinquen al ámbitu universitariu; promoviendo, si fuere necesario, el reciclax en llingua asturiana d’aquellos funcionarios que, ocupando puestos claves, acueyan llibremente tal posibilidá"" xunto con ""Anovar y afondar nos actuales alcuerdos de collaboración ente la Universidá d’Uviéu y l’Academia de la Llingua Asturiana (práutiques del alumnáu, cursos d’estensión universitaria, programes formativos pal personal universitariu, asesoramientu llingüísticu, etc.)"" y tamién "" Emplegar l’asturianu, xunto col castellán, n’ámbitos simbólicos del espaciu universitariu: rotulación, imaxe corporativa, estructura básica de la páxina web, elementos de merchandising, publicidá, programes y folletos, espublización de libros, etc"". Finalmente, en rellación a la cultura asturiana, Paz d'Andrés comprométese a ""llevar darréu iniciatives como la planificación de xornaes, alcuentros y congresos que tomen como referencia aspeutos básicos de l’antropoloxía social y cultural asturiana, asina como’ l fomentu de la investigación al rodiu d’estes temátiques y el so espardimientu al traviés de coleiciones específiques, preferentemente n’asturianu, dependientes de la universidá"" y tamién ""la dignificación del teatru asturianu, afitando calces pa que formaciones de teatru universitariu representen obres d’autores asturianos de güei, tanto n’asturianu como en castellán"" Otru puntu recueye ""L’estudiu y espardimientu de les dixebraes formes de la música tradicional asturiana, asina como la convocatoria d’enventos y actividaes al rodiu d’elles: esposiciones, recitales, concursos, grabaciones, etc"" y tamién ""La dignificación de la lliteratura en llingua asturiana, centrándose en poesía y narrativa, al traviés del so estudiu, del establecimientu de concursos lliterarios, de la espublización de llibros monográficos y antoloxíes, etc"". Dende la candidatura de Paz d'Andrés adelántase finalmente que'l so programa electoral, en rematándose, va editase y repartise billingüe n'asturianu y castellanu."