La Caravana pola oficialidá anduvo per L.lena y Ayer

La Caravana pola Oficialidá celebró'l pasáu sábadu 3 una nueva edición de les sos actividaes, espardiendo ente la opinión pública'l so mensaxe a favor de la oficialidá del asturianu. Saliendo dende les escueles d'Uxo en Mieres, los más de trenta coches que tomaron parte n'actividá del Conceyu Abiertu pola Oficialidá recorrieron y repartieron propaganda y conversación peles localidaes de Felechosa, Cabanaquinta, Morea, Mieres, La Pola o Campumanes, ente otres paraes.

En llegando a la Pola L.lena les actividaes incluyeron un alcuentru na plaza'l mercáu col grupu baille Xanzaina pa depués dir xintar a Carabanzo nuna espicha organizada pola asociación de vecinos. A les siete la tarde entamaron les actuaciones nel Teatru Vital Alza de La Pola. Liseo, el gaiteru Carabanzo, el grupu de neños Pingüínos Asesinos y los conxuntos Fala non Caduca y Adizión Etílika.

La plataforma Conceyu Abiertu pola Oficialidá trabaya asina cola vista puesta na próxima manifestación a favor del reconocimientu de la oficialidá del asturianu nel estatutu d'autonomía, que va tener llugar el próximu 24 de payares n'Uviéu. El recorríu de la marcha y tolos detalles rellacionaos cola mesma puen consultase na web oficial de la manifestacion.