El grupu "San Félix" prepara unes xornaes culturales en Candás

El Grupu de Baille Tradicional San Félix de Candás yá tien zarráu'l programa de la IV Selmana de la Cultura Astur, que va celebrase en La Baragaña (Candás) los díes 10 y 11 de payares. El programa d'actos entama'l vienres día 10 a les seis de la tarde cola inauguraciónde la II Feria del Discu y del Llibru n'Asturianu, presentándose'l númberu 3 de la revista lliteraria "formientu". El candasín Xurde Fernández va aprovechar esa mesma tarde pa presentar el so llibru "Volver"actuando dende les 7 el grupu de música infantil n'asturianu "Xentiquina". "Vía de Serviciu" llibru colectivu col que fai la so estrena la Editorial Suburbia, va presentase a les siete y media de la tarde, mientres que dende les ocho y media, Pablo Texón, Sergio Camblor y Pablo X. Suárez van facer un llectura de poemes. Les actividaes del día echen el piesllu cola actuación del dúu Mestura, que promociona'l so discu 'Agua del norte'.

Esti mesmu conxuntu va facer el día 11 una actuación pa la reciella dende les 17:45h xunto colos 'Poemes de carambelu' de Marisa y Luis. A les seis y media va ser la presentación del segundu númberu de la revista Remanecer, y a les siete, va ser Alberto Álvarez Peña quien presente la "Guía de la Mitoloxía Asturiana". Los actos de pieslle d'esta IV Feria van centrase na presentación del tercer númberu de la revista 'El Cuirno' especializda en temes culturales de la comarca del cabu Peñes, y que va facese a les siete y media, y nun conciertu de música tradicional que va tener llugar a les ocho de la nueche.