Los autobuses llanzadera comuniquen dende güei llunes la estación de tren de Llugo Llanera colos polígonos del conceyu

El Consorciu de Tresportes d'Asturies (CTA) entama güei llunes una rede d'autobuses llanzadera que va comunicar la estación de tren de Llugo Llanera colos tres polígonos industriales del conceyu: Silvota, Asipo y Parque Tecnolóxicu. La midida pretende facilitar el treslláu de los trabayadores en tresporte públicu, a fin torgar los problemes de tráficu rodáu qu'hai tolos díes nuna zona pela que pasen 30.000 coches diarios.

El proyectu presentáu el pasáu vienres en rueda prensa por Julián Bonet, director xeneral de Tresportes del Principáu, y polos tres presidentes de les asociaciones d'empresarios de los tres polígonos: Marcos Sastres (Parque Tecnolóxicu), Fernando Villa (Asipo) y José Ortega (Silvota) consiste n'autobuses que van salir hacia cada polígonu dende la estación de Llugo Llanera ente dos y tres minutos dempués de cada tren de cercaníes, llegando al mesmu llugar diez minutos enantes de la partida del serviciu ferroviariu.

Esta prestación va poder utilizase colos mesmos abonos y tarifes del billete únicu ofrecíu pol Consorciu de Tresportes.

Bonet esplicó que se trata d'una midida plantegada pa "dar solución a los problemes de tráficu na zona" ello con un preciu atractivu alredor de los 38 euros mensuales. Según los datos de los empresarios, más de 20.000 persones trabayen nestos llugares, onde al día entren y salen sobre 32.000 vehículos. Esta situación xenera, según Fernando Villa, presidente d'Asipo, una "circulación ensin control, con continuos atascos, con coches aparcaos en cualquier llugar y con salíes bloquiaes". Señaló nesti sentíu, "la falta d'una normativa d'ordecación del tráficu nestos llugares", asina como "la mala educación de munchos conductores".