Xuristes pol Asturianu denuncia l'actitú de la Conseyería d'Educación a cuenta del Curriculum

"Sumándose a la rabasera de crítiques y condenes a la Conseyería d'Educación pol tratamientu del asturianu na redacción del curriculum d'enseñanza infantil, el colectivu ""Aconceyamientu de Xuristes pol Asturianu"" dio a conocer una carta que va facer llegar personalmente al Conseyeru d'Educación na qu'afirma que'l currículu propuestu ye ""copia d’un testu fechu pa la educación en territorios nos que nun se fala otra llingua más que'l castellán"".

Los xuristes valoren en términos tán negativos la propuesta curricular qu'aseguren que fai paecer un mal menor el fechu de que ""se xestione la Conseyería col mesmu xeitu que si se tratare d'una Delegación Provincial del Ministeriu (...) atarricándola de cargos, puestos y puestinos con xente de non acreitáu valir profesional nomada a deu"". El grupu de xuristes y abogaos defensores del asturianu afirmen que la propuesta curricuular esfrónase contra la llegalidá de la Llei d'usu y promoción del asturianu, l'estatutu d'autonomía y la Carta Europea de les Llingües Rexonales o Minoritaries, polo qu'esixen una rectificación y proponen como posible documentu base pa la so redacción el curriculum de Galicia, ""una rexón que tien de perconocer vusté (en referencia a Riopedre) dada la so condición de gallegu""."