L’Academia de la Llingua celebra’l II Conceyu Internacional de Lliteratura Asturiana

L'Academia de la Llingua Asturiana organiza, del 5 al 8 d'esti mes de payares qu'entra, el II Conceyu Internacional de Lliteratura Asturiana. Les conferencies y comunicaciones del certame van lleese nel Salón d'Actos de la Facultá de Filoloxía de la Universidá d'Uviéu, darréu del actu inaugural que va facese nel Salón d'Actos del Campus d'Humanidaes de la Universidá el martes 5 a les 17:00h y que va tener de protagonista al filólogu Xosé Lluis García Arias y va contar cola actuación musical de Corquiéu. El Conceyu Internacional garra'l testigu de les tradicionales Xornaes Internacionales d'Estudiu, y nelli van participar especialistes españoles y estranxeros. El programa enteru pue consultase na web de l'ALLA, que va dar tamién diplomes acreditativos d'asistencia a les persones interesaes.