Los productores albidren que podría perdese un 25% de la collecha de faba

El retrasu na collecha provocáu pol mal tiempu y el dañu provocáu a resulta d'ello pola mancha nes fabes faen que l'añu de la legume asturiana pinte peor de lo que contaben de mano los sos productores. Anque estos peritaben en 190 tonelaes la collecha, dende'l Conseyu Regulador de la Denominación d'Orixe Faba Asturiana anuncien que va tener que tirase ente'l 20 y 25% de la faba por causa de la mancha, baxando la recoyida hasta les 140 o 145 tonelaes.

El mal tiempu que llevó a que la faba tuviera de semase más tarde de lo normal, y l'agua podreció y torgó munches plantes pela base. L'agua que cayó pel branu estropió igualmente la flor, y tamién ye l'agua la culpable de que muncha faba nun cure y de que críe mancha dientro de los caxellos. Sicasí, dende'l conseyu recuerden que, anque baxe la producción, la calidá de la faba nun va ser peor que la d'otros años. El conseyu cuenta con que se faigan 240.000 etiquetes pa otros tantos envases de faba, los más d'ellos pa esportar fuera d'Asturies, en cuantes que'l consumidor asturianu suel mercar la faba a granel ensin empaquetar.

Por cada kilu de faba, l'agricultor recibe ente 6,5 y 8 euros, llegando al consumidor final ente los 14,00 y los 26,00 euros. El Conseyu Regulador llamenta que'l cultivu de faba asturiana ye "l'únicu cultivu d'un productu tradicional y de calidá que los sos productores nun reciben ayuda dalguna pol so llabor", lo mesmo que'l dañu que causen xabariles y corzos nos fabales, que tampoco cubren les ayudes públiques nin los seguros agrarios. El conseyu apuntó tamién a la comercialización de faba de procedencia desconocida y que s'empaqueta por asturiana como un de los daños más graves al negociu de la faba n'Asturies.