Cultura presenta'l premiu 'Nuevos Realizadores' pa películes curties

El director del Institutu Asturianu de la Mocedá, Guillermo Martínez Suárez, calificó güei'l premiu 'Nuevos Realizadores del Principáu d'Asturies 2007' como'l "más importante" al que pue optar un xoven curtiumetraxista nel Principáu.


Na rueda prensa de presentación del galardón, Martínez Suárez declaró qu'esti premiu ye ún de los de mayor importancia a nivel nacional en cuantes a cuantía económica. En concretu, el primer premiu d'esti galardón ta dotáu con 26.000 euros, y el segundu con 14.000, en total, el doble en comparanza cola anteiror edición.
Pal director del Institutu Asturianu de la Mocedá, la dotación económica del premiu va ayudar non tantu a la producción del curtiumetraxe, que ya se ve abaratada gracies al dessarrollu de les nueves tecnoloxíes, como al espardimientu y exhibición del mesmu.
"Dende l'entamu vamos siguir trabayando nel apoyu a los nuevos realizadores", manifestó'l responsable del Institutu Asturianu de la Mocedá.

Guillermo Martínez también adelantó que nos próximos díes la conseyera de Cultura va presentar el calendariu de la Film Comission.
Les bases pa presentase a esti premiu, del que'l plazu fina'l 30 del presente mes, inclúi que les obres nun superen los 25 minutos de duración, que seyan en castellán o asturianu y que los realizadores nun se presentaren previamente a esti galardón. El ganador d'esti premiu va fallase na celebración del Festival de Cine de Xixón, y un añu más tarde ésti va exhibise nel propiu certamen cinematográficu.