El Teatru Xovellanos va dar entraes de baldre pa la conferencia d'Al Gore sobre'l cambiu climáticu

El Teatru Xovellanos de Xixón va repartir de baldre, al traviés de les sos taquilles, 775 entraes p'asistir a la conferencia que va pronunciar el premiu Príncipe d'Asturies de Cooperación Internacional 2007, Al Gore, el próximu xueves, a les 10.30 hores, titulada 'Una verdá incómoda', el mesmu nome del videu que realizó p'alvertir sobre'l cambiu climáticu y que foi oxetu de polémica estes selmanes al detectar un xuez inglés dellos errores graves nos so conteníos de la cinta.

La ponencia, na que van proyectase imaxes y diapositivies, va durar 90 minutos. Asina lo esplicó en rueda prensa, el conceyal José Manuel Sariego.
Sariego indicó que les entraes van repartise de magar les 10.00 hores del próximu llunes, hasta que queden s'acaben. De la mesma manera, avisó de que sólo se van entregar dos entraes por persona, pa lo que va haber de mostrar el DNI. Amás, d'estes 775 entraes, la Fundación Príncipe d'Asturies va acutar pa ella 200 y el Conceyu de Xixón otres 100 pa protocolu.

Aconseyó tamién a los asistentes a la conferencia que vayan con adelantu, p'axilizar el trámite d'entrega de los aparatos de traducción simultánea. P'acceder a ellos va ser necesario mostrar el DNI. Los medios gráficos, los audiovisuales y les radios sólo van poder grabar o tomar imaxes nos cinco primeros minutos de la ponencia.

El conceyal indicó que'l día de la conferencia, organizada pola Fundación Príncipe d'Asturies, Al Gore va ser recibíu a la entrada del Teatru Jovellanos pola alcaldesa de Xixón, Paz Fernández Felgueroso, a les 10.15 hores. Tres la conferencia, Al Gore va viaxar a París pa entrevistase col primer ministru francés, Nicolas Sarkozy, pa llueu tornar a Asturies, onde va dir a la gala d'entrega de los Premios Príncipe pa recibir el galardón.

Tamién destacó que la presencia d'Al Gore na ciudá "nun ye casualidá", sinón frutu de les conversaciones de l'alcaldesa cola Fundación Príncipe, al igual que se fizo otros años con otros galardonaos.
Paralelamente, Sariego apuntó que'l Conceyu tuvo faciendo xestiones cola Conseyería y el Ministeriu de Mediu Ambiente, pa tratar que'l día de la conferencia, sinón otru día, se pueda proyectar nes escueles de Xixón el videu d'Al Gore, 'Una mirada incómoda'.