Migoya píde-yos voluntá d'alcuerdu a los Grupos Parlamentarios sobre los presupuestos

La conseyera d'Alministraciones Públiques y Vocera del Gobiernu, Ana Rosa Migoya, pidió güei a los Grupos Parlamentarios de IX-BA-LV y PP "sinceridá" y "voluntá d'alcuerdu" pa llegar a un pactu sobre los próximos presupuestos rexonales y que "Asturies nun pare".

Migoya fizo estes declaraciones a los periodistes en L.luarca, tres del conceyu del Conseyu de Gobiernu.

Entrugada pol calificativu de "tomadura de pelu" qu'IX-BA-LV dio al conceyu del martes pa tratar sobre los presupuestos, Migoya señaló que nestos alcuentros el Gobiernu avanza les llinies mayestres del proyectu de Presupuestos, les prioridaes de gastu no sectorial y lo territorial, y les polítiques que define'l proyectu, "porque un presupuestu nun son sólo númberos".

Comentó que nel conceyu con IX realizóse una primer aproximación a eses grandes llinies del Presupuestu y señaló que, en sucesivos conceyos, esto va dir cocretándose nos estaos numbéricos que configuren una llei presupuetaria. "Pero pa llegar a los númberos, primero hai que definir les prioridaes y les polítiques que se quieren desarrollar colos Presupuestos".

Migoya esplicó que "Tamos siendo sinceros y naguamos porque los Grupos Parlamentarios tengan esa mesma sinceridá porque mos xugamos muncho en cuantes a que la meyora de la nuesa economía y que'l ritmu de crecimientu de la nuesa comunidá algamáu nos últimos años nun pare".