Xunta Moza y otres organizaciones denuncien la represión a militantes asturianistes

La organización Xunta Moza, estaya de mocedá de la Xunta Pola Defensa de la Llingua, celebró ayeri una rueda de prensa conxunta con representantes del Conceyu Universitariu pol Asturianu (CUPA), Mocedá d'Andecha-EMIR y de los Coleutivos de Mocedaes Comunistes (CMC), pa denunciar lo que se calificó de "situación marxinal de la llingua asturiana nel sistema educativu y asaltu sistemáticu a los derechos llingüísticos más básicos de tola población estudiante" ello al rau del casu d'un mozu condenáu a una multa de 350 euros por pegar carteles pa la última fuelga d'estudiantes pol derechu a estudiar asturianu.



Los fechos tuvieron llugar el pasáu mes de marzu, cuando un miembru de la Xunta Pola Defensa de la Llingua pegaba carteles n'Avilés convocando a la fuelga na Enseñanza Secundaria n'esixencia d'una mayor presencia del asturianu nos centros d'enseñanza. Identificáu pola Policía Local, el mozu recibió apocayá una multa de 350 euros acordies coles ordenances de llimpieza avilesines. Moisés Cima, de Xunta Moza, esplicó que "si bien ye verdá qu'esa ordenanza existe, tamién ye verdá que goza de flexibilidá, porque nun se multa a la xente que pega carteles p'anunciar fiestes o asuntos comerciales". "Paez que la ordenanza namás s'aplica cuando se peguen carteles que molesten, sían sobre'l tema de la llingua o d'otres cuestiones reivindicatives". Pa recaudar fondos y facer visible esta agresión va facese una fiesta solidaria'l prósimu vienres 26 d'ochobre nel chigre de la Xunta n'Uviéu, La Casa Posafuelles.

Na rueda de prensa presentóse tamién a los medios un informe sobre la situación de la llingua asturiana na enseñanza nel que se destaca "qu'a la falta d'un marcu llegal dignu que garantice los derechos llingüísticos y educativos de los estudiantes, súmase'l fechu de que la Conseyería d'Educación incumple la curtia llegalidá vixente de manera sistemática". Les organizaciones espunxeron los casos de dellos institutos de secundaria como'l de Pando n'Uviéu, La Llaboral en Xixón o el de Llanes ente otros, a los qu'acusen de "negar a los sos alunmos el derechu a estudiar l'asturianu incluso pa grupos de matriculaos "mui superiores al ratio mínimu d'ocho impuestu illegalmente pola Conseyería".