El PP perita'l coste del teatru de la Llaboral en 18 millones

Los diputaos del Partíu Popular na Xunta Xeneral del Principáu Ramón García Cañal y Joaquín Aréstegui criticaron nuna rueda de prensa celebrada ayeri que'l coste final de les obres de reconstrucción y ampliación del Teatru de la Universidá Llaboral pue xubir hasta los 18 millones d'euros, lo que supón el triple de la inversión prevista pol gobiernu de 6,65 millones.

Aréstegui señaló qu'al presupuestu de primeres hai qu'amestá-y ún modificáu con un importe de 4,26 millones d'euros, aprobáu pol Conseyu de Gobiernu n'avientu del 2006, "lo qu'implica un incrementu del 64,05 por cientu del coste inicial". Asina, pal diputáu popular, si a ésos cerca d'once millones d'euros se-yos suma'l diez por cientu de la lliquidación real xunto con otros posibles modificaos, la obra xubiría a cerca de 18 millones. Pa los diputaos, esta cifra ye "prudente y optimista" porque tampoco conocen l'importe de salida de la caxa escénica del teatru -encargada a Thyssenkrupp- nin del so posible modificáu, señalaron.