El PP tamién critica la perda de puestos n'enseñanza

"Tres de les crítiques de los sindicatos a la rebaxa de puestos nel sistema educativu asturianu, el diputáu del PP na Xunta Xeneral Emilio Rodríguez declaró ayeri que'l Gobiernu Asturianu quier ""facer caxa"" al eliminar puestos de trabayu de profesores na educación asturiana col fin de facer frente a dellos aumentos de coste, como los derivaos nel Hospital Universitariu Central d'Asturies (HUCA) o la Universidá Llaboral.

Nuna rueda prensa na Xunta Xeneral Emilio Rodríguez criticó asina que'l Principáu d'Asturies pretenda reducir 111 places de profesor na Educación Secundaria Obgligatoria (ESO), dalgo que calificó de ""recorte brutal"".

El diputáu criticó qu'amás se plantegue la propuesta de manera ""unillateral"", ensin contar cola opinión de los profesores y de los sindicatos de la enseñanza. Nesti sen, recordó qu'hai un pronunciamientu de la Xunta Xeneral pidiendo la convocatoria de la Mesa Sectorial d'Educación.

Comentó que la reducción de places sólo va valir pa crear inestabilidá na Educación y va perxudicar al sistema, y a dellos programes, como'l de la educación billingüe.

Anunció que'l PP va solicitar la declaración na Xunta Xeneral del Poder Xudicial del conseyeru d'Educación José Luis Iglesias Riopedre, que ta ""escondíu"" y ""ausente"".

Rodríguez añadió que Riopedre ""tien de dar munches esplicaciones"", dao que la reducción na plantiya orgánica ye decisión de la Conseyería d'Alministraciones Públiques, encabezada por Ana Rosa Migoya, dexando asina, ""ensin nengún sentíu"", la Direición Xeneral de Recursos Humanos d'Educación.

Sobre Ana Rosa Migoya, dixo que ""miente"" al dicir que nun hai nenguna reducción, sinón que lo que se plantega ye una reorganización atendiendo a una nueva realidá poblacional. Como casu, punxo la situación d'Uviéu, onde, a pesar de ganar población, señaló que se reducen 16 places, de les que diez correspuenden al institutu Alfonso II."