Entamen en Piloña les Xornaes de Lliteratura Infantil en Llingua Asturiana

Güei martes 16 d'ochobre entamen nel Infiestu (Piloña) les Xornaes de Lliteratura Infantil en Llingua Asturiana. Les actividaes, que van celebrase na Casa la Cultura de L'Infiestu van desarrollase hasta'l 9 de payares, cuando va facese la entrega de premios del concursu de cuentos pa escolinos.

Les actividaes entamen güei martes 16 cola presentación del llibru "Pepu'l Pastor" de Miguel Rojo y siguen el miércoles 17 cola presentación d'otru llibru "Pol, un perru real" de Quique Carballeira.

El miércoles va celebrase tamién l'actividá del cuentaxuegos, un taller de creación lliteraria pa neños, y el xueves 18, a partir de les cinco y media de la tarde, va facese'l cuenta cuentos audiovisual "Cuentos de la Curuxa", faciéndose'l vienres 19 un taller de personaxes nel que los neños van poder crear ellos mesmos a los protagonistes de les hestories.

D'otra manera, sigue abiertu'l plazu pa unviar cuentos al concursu pa escolinos de primaria convocáu pol Ayuntamientu dientro de les xornaes.

El llargor de los trabayos tendrá que tener dos fueyes, como munchu, y con temática llibre. Serán valoratibles les ilustraciones qu'acompañen el testu. Nos cuentos hai que poner les señes de los concursantes: nome, escuela, cursu, edá y dirección. Los cuentos hai que los mandar enantes del 31 d'ochobre, a la Casa Municipal de Cultura Marqués de Vistalegre de L'Infiestu, asitiada na cai Cuadonga, poniendo nel sobre que se trata d'una narración pa participar nesti concursu. Premiaráse'l meyor cuentu de cada categoría (primeru, segundu y terceru de primaria) con llotes de llibros, material escolar y trofeos. La entrega de premios va ser el día 9 de payares, nel actu lliterariu de pieslle de les Xornaes de Lliteratura Infantil. Nes pasaes ediciones esti certame lliterariu, que siempre cuntó con bayura de cuentos concursantes, tuvo más de 150 trabayos presentaos.