La Xunta Pola Defensa de la llingua denuncia qu'una escuela de Xixón fai del asturianu una optativa

"La Xunta pola Defensa de la llingua Asturiana emitió esti fin de selmana un comunicáu nel que denuncia ""un nuevu casu d’ataque a la escolarización de la llingua asturiana y a los derechos llingüísticos y educativos de los escolinos y escolines"". La denuncia de la organización va contra la Escuela Pública Ríu Piles de Xixón, centru onde entamando a impartise la enseñanza de la “Llingua de Señes”, emplegada por persones con discapacidaes auditives. Ello ye que l'asignatura dase a escoyer como asignatura alternativa a la de Llingua Asturiana, convirtiendo pola vía de los fechos, según denuncia la Xunta, a l’asignatura d’asturianu nuna asignatura “optativa”, en cuenta d’una asignatura “voluntaria” como ta afitao por llei y nel testu del currículu de la Enseñanza Primaria.

La Xunta alvierte que ""la Llei d’Usu y Promoción del Asturianu afita nel so artículu 10.3. como la elección del estudiu o del usu del asturiano como asignatura del currículu, en nengún casu va poder ser motivu de discriminación de los alumnos...Pa los que lu escueyan, el so deprendizaxe o usu nun va poder constituir un obstáculu pa recibir la mesma formación y conocimientos n’igualdá de condiciones que’l restu del alumnáu.” Según entiende la organización, la llei impide esprésamente que l’estudiu de la llingua asturiana pueda competir col d’otres materies, pa evitar la discriminación de los escolinos qu’escueyen asturianu al nun tener accesu a la mesma formación qu’aquellos que nun lo escoyeran"".

Nel comunicáu, la Xunta pola Defensa de la Llingua Asturiana denuncia asinamesmo la ""responsabilidá de la Conseyería d’Educación nestos casos qu’entamamos a conocer"". A la organización lláma-y l'atención ""El fechu de que’l director del centru sea’l qu’espón el casu a los medios, lo que ye bona preba de que la inspección educativa nun actúa nestos casos y qu’estes maniobres cuenten col preste de la Conseyería"". Por ello, la Xunta pola Defensa de la Llingua Asturiana quier dar anuncia de que va llevar alantre ""les acciones llegales necesaries pa tornar esta situación llamentable"" al empar qu'esclaria ""que’l marcu llegal que regula la presencia de la llingua asturiana nel sistema educativu ye mui curtiu, probe y discriminatoriu. Por ello ye más claramente inaceptable que s’incumpla dende les alministraciones""."