IX va adelantar la so asamblea pa da-y un reblagu a la organización

El coordinador xeneral d'Izquierda Xunida d'Asturies Jesús Iglesias, anunció ayeri nuna rueda de prensa celebrada na sede de la formación, qu'ente'l 30 de payares y el 1 d'avientu va celebrar n'Uviéu una asamblea col oxetivu de "zarrar resquiebres del pasáu y facer un llamáu pa reforciar la izquierda renovadora". La presidencia de la formación, que decidió adelantar l'asamblea prevista pa mayu énte les elecciones xenerales de marzu quier que l'alcuentru, nel que van tar presentes 550 delegaos suponga la "reafirmación de los conteníos políticos", según esplicó Iglesias.

El líder d'IX dixo que nel alcuentru, que quier ser participativu, la organización quier que s'asuman los valores que la organización foi amestando nos últimos años al so discursu, sobremanera l'ecoloxismu y l'asturianismu. L'asamblea va servir tamién pa configurar la realidá política a la que s'enfrenta IX "nel marcu de les incertidumes que lleva arreyáu un gobiernu en minoría" y que van tocar directamente a la organización en cuestiones como'l mediu ambiente o la reforma del Estatutu d'Autonomía.

El secretariu d'Organización d'IX-Asturies, Ángel González, señaló na so intervención que "nun se trata de facer una asamblea pa depurar nada porque nun hai nada que depurar", en referencia a los problemes internos de la formación que llevaron a la creación de la formación Asamblea de Ciudadanos por la Izquierda.

Xunto cola reunión, IX va llevar alantre una campaña "intensa" d'afiliación per toa Asturies, col oxetivu de pasar de los dalgo más de 4.500 afiliaos que tien actualmente a un mínimu de 5.000.

Jesús Iglesias fizo tamién l'anuncia oficial de la candidatura de la ex conseyera de Vivienda y Asuntos Sociales, Laura González, como cabeza de llista d'IX pa les próximes elecciones xenerales de marzu, nes que la formación pretende recuperar el so históricu diputáu en Congresu que perdiera nes pasaes elecciones del 2004.