Riopedre reconoz que la matriculación n'asturianu xubió más de lo que contaba Educación

El Conseyeru d'Educación y Ciencia, José Luis Iglesias Riopedre, anunció ayeri que'l 58% de los escolinos de Primaria escoyeron esti cursu la opción de llingua asturiana, colo que la matriculación xubió hasta los 19.919 escolinos, contra los 16.019 del pasáu cursu, lo que supón un incrementu de dos puntos sobre'l porcentaxe algamáu na matriculación del cursu 2006-2007.

L'incrementu d'esti añu triplica les previsiones de la conseyería, que falaben d'un dos o un tres por cientu, con unos 300 o 400 estudiantes más.

Amás, nun sólo aumentó'l númberu d'estudiantes en llingua de la rede pública, sinón que según Riopedre, esti añu va haber también unos 500 alumnos más que l'añu pasáu na concertada.

Nel casu de secundaria les cifres caltiénense asemeyaes a los 4.400 del últimu cursu, si bien nesti nivel l'asignatura de 'llingua' ya s'ofrez nun paquete de delles optatives a elixir una, ente les que figuren otres materies como'l francés. La conclusión del conseyeru ye que la llingua asturiana ta "asentada na rede educativa del Principáu y tien bona salú". Sicasí, el conseyeru recordó que "el fechu de que s'estudie na escuela nun quier dicir que tenga la presencia que debería tener na cai, polo que hai que tomar otres midíes d'apoyu pa potenciar la llingua".


Riopedre dio estos datos y valoraciones na presentación ayeri de los llibros de l'asignatura de Llingua Asturiana pa los cursos 1º, 2º y 3º d'Educación Primaria na Biblioteca Pública Pérez d'Ayala d'Uviéu.

Pa esti cursu publicáronse los llibros de l'asignatura pa los estudiantes d'Educación Primaria: "Pitín 1" pa los escolinos de primer cursu, "Pitín 2" pa los de segundu y "Esguil 3" pa los de terceru, unos llibros que van completase l'añu qu'entra colos manuales pa 4º,5º y 6º, completándose nel cursu 2008-2009 la edición de los llibros de testu pa toles etapes de la enseñanza non universitaria. Según s'esplicó dende les Conseyeríes de Cultura y Educación, los manuales pa 1º y 2º de Primaria trabayen conteníos rellacionaos cola comprensión llectora, el vocabulariu y la ortografía, enxertando cada volume seis unidaes didáctiques rellacionaes con cantares.

Nel casu del llibru pa los estudiantes de tercer cursu de Primaria, el filu conductor de les unidaes didáctiques son los personaxes de la mitoloxía asturiana.

Cultura y Educación dieron tamién anuncia de qu'ente dambos departamentos creóse una coordinación permanente n'asignatura de llingua pa dotar a centros y profesores de los materiales afayadizos, organizar cursos de formación del profesoráu o promover campañes informatives de matriculación n'asignatura de Llingua Asturiana.