Trunfu perimportante del Farho Xixón Baloncestu n'Almería

"El Farho Xixón Baloncestu algamó una victoria perimportante en casa del Almería, pese a xugar ensin xugadores americanos, debío a les mancadures de Wolfram y Kiefer, y a que l'equipu andaluz, si los ganaba, pasábalos na clasificación, al tar empataos hasta esta xornada a victories. Los almerienses entamaben el partíu col record de trunfos siguíos de tola LEB -nueve, pues nun perdíen dende'l nueve de payares-. El resultáu foi mui axustáu, 66 a 68, y sofitóse nun gran últimu cuartu de los xixoneses, que ganaron por 12 a 24, hasta esi momentu los asturianos foron perdiendo con diferencies d'hasta quince puntos nel tercer cuartu.

Amás hai qu'amestar que la derrota del Illescas en Tarragona que pon a los xixoneses -agora segundos, empataos col Vic- a una victoria del lideratu. L'entamu del alcuentru pa los asturianos nun foi bonu, pues taben mui desacertaos nel tiru y ello reflexóse nel tanteador del primer cuartu, trece puntos. Les coses siguieron mal nel segundu cuartu, nel que los locales llegaron a tener una ventaya de once puntos, 24 a 13. Ehí apaeció Sony Vázquez qu'averó nel marcador al Farho Xixón con cuatro puntos siguíos. Los almerienses vovlvieron a garrar una ventaya de nueve puntos, que los asturianos dexaron en trés puntos, 31 a 28, anque al descansu el resultáu yera de 33 a 28. Na segunda parte les coses nun cambiaben y la ventaya local llegó a los quince puntos con un 52 a 37. El cuartu finó con un 54 a 44. Nel últimu periodu los fallos d'anotación del Almería y la reacción xixonesa punxeron un 60 a 61, primera ventaya asturiana, y dempués l'empate a 61. Nesos minutos caberos foi perimportante'l trabayu de José María Balmón, que metió cuatro puntos que foron decisivos pala victoria final.

Nel equipu xixonés hai que destacar a Adrián García (11 puntos y 9 rebotes), Rubén Suárez (11 puntos, 4 rebotes y 2 asistencies), Sony Vázquez (12 puntos, 3 rebotes y 1 asistencia) y José María Balmón (14 puntos y 8 rebotes). Nos almerienses el más destacáu foi Tyray Pearson (con dobles figures -14 puntos y 15 rebotes-, 1 asistencia y 29 puntos de valoración). La prósima selmana nun hai lliga, pues va disputase en Palencia la Copa Príncipe, na que participa'l Farho Xixón, enfrentándose na primera eliminatoria col Vic.

Ficha técnica:

Deportes Blanes-BS Hoteles Almería:Tyray Pearson (5), Fran Rueda (4), David Mesa (11), Jesús Castro (10) y Javier Zaldive (8). Tamién xugaron: Adrian Tigert (5), Roberto Rueda (11), Anton Savitski y Juan Carlos Liñán (3).

Farho Xixón Baloncestu:RubénSuárez (11), Peter Rajniak (8), Adrián García (11), José María Balmón (14) y Chus Pineda (5). Tamién xugaron: Sergio Alonso, Sony Vázquez (12), Lucian Kieser y Logi Gunnarsson (11).

Árbitrios: Alberto Sánchez y Álvaro López. Nel Farho Xixón Baloncestu foi elimináu por cinco faltes personales Chus Pineda y nel Almería Javier Zaldive. Partíu de la décimo octava xornada de la Addeco Lliga LEB Plata, xugáu nel Pabellón Rafael Florido d'Almería. Parciales per cuartos: 19-13, 14-15, 21-16 y 12-24."