El Sporting llogró un puntu en El Ejido

Poli Ejido y Sporting empataron a un gol nun partíu que supunxo la estrena de Castro Santos, padre del sportinguista Diego Castro, como entrenador del Ejido, un equipu de gran presupuestu que s'alcuentra empozáu en zona de dscensu. El primer tiempu foi de dominiu local anque ensin un xuegu prestosu por nenguna de les dos partes. El Poli adelantóse nel minutu 25 racies al ex-sportinguista Gerardo, el meyor del equipu local el sábadu. El llaniscu garró un centru de Pedro Vega que Jorge nun pudo disviar y batió a Roberto de tiru cruciáu. El Sporting tuvo unes poques ocasiones a lo último del primer tiempu, pero'l xuegu de los asturianos alicó cola entrada de Míchel por Iván Hernández. Les oportunidaes clares entamaron a llegar y nel 55 Barral marcó un gol d'antolxía controlando'l balón en trés toques dientro del área pa batir a tiru cruciáu al porteru. El Sportin echábase arribe y Kike Mateo marcaba nun corner a l'altura del segundu palu, pero l'árbitriu anulaba'l gol por una supuesta falta. El colexáu cortó pela freba la posible remontada del Sporting, que pudo llograr Mate Bilic con un balón qu'intentó picar per alto, con una discutida segunda mariella a Mateo. Nos últimos minutos, un Xixón con 10 aguantó como pudo'l bastiáu, y Roberto atayó un peligrosu balón de Gerardo. A la fin, un repartu de puntos que supón pal Sporting aguantar una selmana más nuna plaza d'ascensu cada vegada más competida. El Celta a ta a tiru d'un puntu.