CC.OO denuncia que yá son 17 los trabayadores finaos n'Asturies en 2007 n'accidentes llaborales

El sindicatu Comisiones Obreres ta acabante de denunciar l'aumentu de la siniestralidá llaboral n'Asturies, enforma nel sector del metal. Por mediu d'un comunicáu, el sindicatu conseña qu'en menos de 15 díes hubo nel nuesu país tres accidentes graves nel sector del metal, ún d'ellos mortal, "cifres inasumibles y tráxiques", en palabres de Jeremías Dos Santos Zapico, secretariu de Salú Llaboral y Mediu Ambiente, señalando amás que "la reiterada siniestralidá nel trabayu nun ye frutu de la casualidá, sinón de la falta de cumplimientu de les midíes de prevención qu'apliquen les empreses".

Jeremías Dos Santos Zapico llamentó que son yá 17 los trabayadores muertos n'Asturies, ensin contar los muertos in itinere -desplazamientos al llugar del trabayu-, dende'l 1 de xineru del presente añu y denunció la situación que se vive nel Institutu de Prevención de Riesgos Llaborales, nel que'l Gobiernu asturianu noma a un director que renuncia al cargu y "naide se da prisa en buscar sucesor alegando feches estivales". Finalmente dende CC.OO recordóse que dende xunu "nun s'ofrecen datos de la siniestralidá".