Fred Morrison, estrella nos alcuentros cola cultura de Candás

El Grupu de Baille Tradicional San Félix entama en Candás del 23 al 28 d'agostu los 'III Alcuentros cola Cultura Tradicional' nos que van participar grupos de baille y música tradicional d'Asturies, Galicia, Bretaña y Lituania. L'actu central va cellebrase'l vienres 24 d'agostu a partir de les 23:45 hores y nél va participar l'inimitable gaiteru escocés Fred Morrisón,al que la organización califica como "el meyor gaiteru del mundu".

L'artista irlandés va tocar la nueche del vienres 23 acompañáu de guitarra, vigulín y percusiones nun conciertu nel que tamién van tar les pandereteres de Dulcamara y dellos otros músicos asturianos.

L'alcuentru va entamar el vienres 23 d'agostu y nelli van participar los grupos de baille Aukstaitija de Llituania, el Bagad Gwengamp de Bretaña, l' Asociación Cultural Anturuxas e Sorteiros de Galicia, el Grupu d'Investigación Folclórica Sulabarda d'Asturies y el candasín Grupu de Baille Tradicional San Félix d'Asturies, organizador del certame.

Los 'III Alcuentros cola Cultura Tradicional de Candás' cunten col sofitu del Teatru Prendes, el Conceyu de Carreño, l'Asociación d'Hosteleros de Candás; y la Conseyería de Cultura del Principáu d'Asturies, que collabora nel espublizamientu del tercer volume de la revista 'El Cuirno' que recueye dellos trabayos d'investigación y lliterarios sobre la fastera de Peñes.