L'Arribada va llegar en barcu a Xixón

L'escritor Humberto Gonzali presentó esti vienres en Xixón l'Arribada 2007, un congresu lliterariu y cultural que llega a la so segunda edición con un programa que va facer de la lliteratura n'asturianu la protagonista de la vida cultural de Xixón los díes del 14 al 22 de setiembre. Baxo'l denominador de "Nuevos rumbos de la lliteratura asturiana" l'Arribada va entamar cola llegada de los escritores participantes nun barcu especial a la ciudá de Xixón, onde va recibilos la banda de gaites "Ciudá d'Uviéu", un actu espectacular que va acompañase de la llectura de poemes n'asturianu por cargos públicos del conceyu.

Cola participación de más de cien persones ente escritores, editores y espertos, que van falar en meses redondes sobre cuestiones como la novela histórica n'Asturies, los premios lliterarios o l'esoterismu na lliteratura asturiana, l'Arribada ta organizada pola asociación cultural del mesmu nome y la Oficina de Política Llingüística del Principaú, amás de cuntar col apoyu de la Fundación Municipal de Cultura y Universidá Popular de Xixón, la Sociedá Mista de Turismu de Xixón y la Oficina Municipal de la Llingua.