El Bloque por Asturies protesta pola situación de los campamentos saharauis n’Arxelia

La formación política Bloque por Asturies emitió ayeri un comunicáu en que denuncia la "situación crítica alimentaria que viven les 160.000 persones refuxaes nos campamentos saharauis n'Arxelia". El partíu políticu d'izquierda nacionalista afirma que "más de la metada de les donaciones que se reciben pal Pueblu Saharaui gástense na xestión de les oficines del Altu Comisionáu de les Naciones Uníes pa los Refuxaos (ACNUR) y del Programa Alimentariu Mundial (PAM)" xenerando un retrasu y perda d'ayudes derivaos de la "revesosa burocracia" d'estes entidaes.

El BA asegura que cerca del 80 % de los alimentos básicos de 160.000 refuxaos saharauis nun se cubrieron pal mes de xunetu, qu'un 76% de les muyeres embarazaes sufren d'anemia y qu'un 40% de los menores de cinco años carecen de malnutrición.

El Bloque por Asturies esíxe-y por ello al Gobiernu asturianu que "presente una protesta oficial énte ACNUR y PAM pa que cumplan los sos compromisos y obligaciones colos refuxaos saharauis nel marcu de les convenciones de Xinebra" al empar que denuncia "presiones pa someter al pueblu Saharaui énte les negociaciones con Marruecos".